Աբովյանի քաղաքապետի ընտրության նախնական արդյունքի համաձայն, Քաղաքացիական պայմանագիր կառավարող կուսակցության թեկնածու Գրիգոր Գուլյանը պարտվել է գործող քաղաքապետ Վահագն Գևորգյանին, որը մեծ հաշվով համարվում է ԲՀԿ այսպես ասած ոչ պաշտոնական թեկնածու, կամ ուղակի՝ Գագիկ Ծառուկյանի ոչ պաշտոնական թեկնածու: Ձայների տարբերությունը մեծ չէ, և դա իհարկե անկարևոր տարր չէ, սակայն հիմնական ինտրիգն անշուշտ երկու թեկնածուների դիմակայության ընդհանուր հանգուցալուծումն էր և այն փաստորեն, համենայն դեպս նախնական տվյալով, հօգուտ Գագիկ Ծառուկյանի թեկնածուի է:
Անշուշտ, այդ հանգամանքը կտա բավականին հեռուն տանող վերլուծությունների առիթ: Որոշակի դատողություններ արդեն հնչում են, տեղի ունեցածը որակելով Նիկոլ Փաշինյանի պարտություն: Առերևույթ, հնարավոր է խոսել հաղթանակի և պարտության այդ չափումներով, սակայն Աբովյանում ընտրության կապակցությամբ արժե անել թերևս մի քանի դիտարկում և արձանագրում: Աբովյանը հեղափոխությունից հետո առաջին ՏԻՄ ընտրությունը չէ, որտեղ պարտվում է Նիկոլ Փաշինյանի թեկնածուն: Հիշենք Կապանը, որից հետո Փաշինյանը շռնդալից հաղթանակ է տարել համապետական ընտրությանը: Ընդհանրապես, Հայաստանում ՏԻՄ ընտրությունների և համապետական քաղաքական իրավիճակի ուղիղ ասոցիացիաները խիստ հարաբերական են, քաղաքական համակարգերի և ինստիտուտների չկայացածության պատճառով: Նախկին համակարգում էլ լինում էին ինտրիգներ, ինչպես օրինակ 2012 թվականից առաջ Իջևանի քաղաքապետի ընտրությունն էր՝ ՀՀԿ-ԲՀԿ համատեքստում, որտեղ հաղթեց ԲՀԿ թեկնածուն և շատերն էին այդ հաղթանակը փորձում նախապես պրոյեկցել խորհրդարանի ընտրության վրա, որտեղ արձանագրվեց բացարձակապես այլ արդյունք: Դա նախորդ համակարգն էր, որտեղ ընտրություն չկար, բայց չէ՞ որ նույնը նաև նախորդ ՏԻՄ համակարգի ընտրական գործընթացներում էր: Դա հավաստում է, որ քաղաքական համակարգի չկայացածության և անգամ չգոյության պայմաններում համապետական և ՏԻՄ ասոցիացիաները ամենևին չունեն դասական քաղաքագիտական համարժեքություն:
Ըստ այդմ, խոսել Փաշինյանի պարտության մասին, համարժեք չէ, ինչպես օրինակ համարժեք չէր 2012-ին ընդառաջ Իջևանում ԲՀԿ թեկնածուի հաղթանակից հետո Սերժ Սարգսյանի պարտւթյան մասին խոսելը: Այդուհանդերձ, ՔՊ-ն Աբովյանում պարտվել է, Գագիկ Ծառուկյանի աջակցությունը վայելող թեկնածուն, թեկուզ ոչ ֆորմալ աջակցությունը վայելող՝ հաղթել: Սա իհարկե իր արտացոլումն անկասկած ունենալու է ներքաղաքական դաշտում, ինչի մասին մենք խոսել էինք դեռևս ընտրությունից առաջ:
Նախ, իհարկե հարկավոր է հասկանալ, թե որքանով է ապահովվել ընտրության օրինականությունը: Այլ կերպ ասած, արդյո՞ք Աբովյանի արդյունքը կլինի հարված ոստիկանությանը, քանի որ եղել են մի քանի սկանդալային հայտարարություններ իրավախախտումների մասին: ՔՊ-ականները արդյո՞ք Աբովյանի պարտությունը կփորձեն բարդել իրավապահների վրա, որոնց կմեղադրեն հին մեթոդները կանխարգելել չկարողանալու համար: Այստեղ էական է նաև, թե Նիկոլ Փաշինյանն ինչ մակարդակով և շեշտադրումներով կդնի Աբովյանում թիմի քաղաքական պարտության հարցը: Ըստ այդմ թիմը կարող է այսպես ասած պաշտպանվել պատասխանատվությունը իրավապահների վրա տեղափոխելու միջոցով: Ինչպես հայտնի է, ընտրության նախօրեին անհայտ անձինք այրել էին ՔՊ թեկնածուի շտաբի պետերից մեկի մեքենան և անգամ տունը: Իրավապահները առայժմ չունեն կոնկրետ պատասխաններ, համենայն դեպս հանրությանը ներկայացված:
Մյուս կողմից, արդյո՞ք Աբովյանում հաղթանակը այսպես ասած «պարտքի տակ» է գցում Գագիկ Ծառուկյանին Նիկոլ Փաշինյանի առաջ: Կամ, արդյո՞ք այդ հաղթանակը կարող է Դամոկլեսյան թրի նման կախվել նրա գլխին հենց հնարավոր իրավախախտումների համատեքստում: Այդօրինակ այսպես ասած ներքաղաքական վարկածների մի շարք տարբերակներ է հնարավոր դիտարկել, ընդհուպ այն, որ Աբովյանում հաղթանակը Գագիկ Ծառուկյանին տալիս է որոշակի առավելություն և նրան այսպես ասած մրցունակ է դարձնում Ռոբերտ Քոչարյանի նկատմամբ, թեև շատերն էլ Ծառուկյանի հաղթանակի մեջ կարող են նկատել ՔՈչարյանի հաղթանակ, թեև ԲՀԿ առաջնորդը գրեթե երդվում է, որ կապ չունի նրա հետ: Միով բանիվ, Աբովյանը դեռևս կունենա իր արձագանքները և վարկածները: Սակայն, անհրաժեշտ է կանգնել նաև թերևս մի կարևոր հանգամանքի վրա, որը գալի է իհակրե մտածողությունից: Այն, որ Հայաստանում չի կարող լինել թեկուզ թեժ պայքարով, բայց իրական մրցակցությամբ ընտրություն, որում, այո՝ համապետական մակարդակում իշխող ուժը, վարչապետի գլխավորությամբ, կարող է և պարտություն կրել: Ի վերջո, նաև դրա հնարավորությունը վերականգնելու համար չէ՞ր թավշյա հեղափոխությունը:
