Грузия Online-ի փոխանցմամբ՝ շոգի պատճառով Թբիլիսիի մերձակայքում կտրուկ աճել է օձերի քանակը։ Թբիլիսիի միկրոշրջանների բնակչությունը դիմել է քաղաքապետարանին՝ խնդրելով միջոցներ ձեռնարկել օձերի դեմ, որոնք ագրեսվիություն են ցուցաբերում և հարձակվում մարդկանց վրա։
Նշվում է, որ «Կոբրա» ծառայության մասնագետներին հաջողվել է վերջին մեկ ամսվա ընթացքում բռնել մոտ 100 օձ, որոնց մեծ մասը թունավոր չի եղել, և նրանց խայթոցը վտանգ չի ներկայացրել մարդու համար։
Խնդիրն այն է, որ այդ օձերն ունեն 1.5 մետր երկարություն և սարսափի մեջ են գցում մարդկանց։ Բռնված օձերը փոխադրվում են Թբիլիսիի կենդանաբանական այգի։
Երեկ էլ Թբիլիսիի հիվանդանոցներից մեկում հայտնվել էր օձի խայթոցից տուժած 3 տարեկան մի երեխա։
Հիշեցնենք, որ սողունների վերահսկման «Կոբրա» անվանմամբ քաղաքային ծառայությունը Թբիլիսիում ամեն տարի գործում է մայիսից մինչև հոկտեմբերի վերջն ընկած ժամանակահատվածում։ Ընդհանուր առմամբ, Վրաստանում բնակվում է սողունների 52 տեսակ, որից 3-ը՝ կրիա, 27-ը՝ մողես, իսկ 23-ը՝ օձ։
