Ջեֆ Բեզոսի առցանց ռեթեյլերն առաջիկայում կսկսի ապրանքներ տեղափոխել անօդաչու սարքերով, տեղեկացնում է ՏԱՍՍ-ը՝ հղում կատարելով Associated Press-ին։
Գործակալության տվյալներով՝ Amazon-ի մասնագետները մշակել են դրոնների անօդաչու կառավարման համակարգ, որը թույլ կտա հաղթահարել ցանկացած խոչընդոտ դեպի գնորդ ճանապարհին։ «Անօդաչու սարքի կառավարման համակարգը կհաղթահարի խոչընդոտները և կապահովի թռիչքի անվտանգությունը»,- գործակալությունը մեջբերում է Amazon-ի սպառողական մասնաճյուղի ղեկավար Ջեֆ Ուիլքեի խոսքերը։
Նշվում է, որ ռեթեյլերն առայժմ չի նշել ոչ սարքերի աշխատանքն սկսելու ճշգրիտ ժամկետը, ոչ այն, թե որտեղ են դրանք սկսելու ապրանքներ հասցնել սկզբնական շրջանում։ Ընդ որում՝ ընկերության տվյալներով, դրանք լինելու են էլեկտրական և կկարողանան տեղափոխել մինչեւ 2.2 կիլոգրամ բեռներ 24 կիլոմետր տարածության վրա։
Amazon-ը ԱՄՆ դաշնային ավիացիոն վարչության կողմից նման սարքերի օգտագործման թույլտվություն առայժմ չի ստացել։ Ինչպես նշում է AP-ը, այս տարվա ապրիլին անօդաչու սարքերի թռիչքի թույլտվություն Վիրջինիա նահանգի որոշ շրջաններում ստացել է ամերիկյան Google կորպորացիան։
