Սպիտակ տունը հրապարակել է Ուկրաինայի վերաբերյալ G7-ի համատեղ հայտարարությունը, որում ասված է, որ «Յոթյակի» պետությունները՝ Կանադան, Ֆրանսիան, Գերմանիան, Իտալիան, Ճապոնիան, Մեծ Բրիտանիան և ԱՄՆ-ը, Ռուսաստանին հորդորում են դադարեցնել Ղրիմի կարգավիճակը փոփոխելուն ուղղված ջանքերը: Հայտարարության մեջ նման գործողությունները որակվել են «Ուկրաինայի և միջազգային օրենքի խախտում»: Այս մասին հայտնում է «Ամերիկայի ձայնը»:
«Ցանկացած նման հանրաքվե չի կարող իրավական ուժ ունենալ»,- նշված է փաստաթղթում:
Հաշվի առնելով Ռուսաստանի զինված ուժերի միջոցով ահաբեկումը՝ այդ գործընթացը խորապես սխալ կլինի և բարոյական ուժ չի ունենա՝ ասվում է հայտարարության մեջ: «Այդ պատճառով մենք չենք ընդունում դրա արդյունքները»,- նշվում է G7-ի հայտարարության մեջ:
Ասված է, որ Ռուսաստանի կողմից Ղրիմն իր տարածքին բռնակցելը կդառնա ՄԱԿ-ի կանոնադրության, Հելսինկյան եզրափակիչ ակտի, Ուկրաինայի հետ բարեկամության, համագործակցության և գործընկերության մասին 1997 թվականի պայմանագրի և 1994 թվականի Բուդապեշտի հուշագրի ներքո Ռուսաստանի ստանձնած պարտավորությունների ուղղակի խախտում:
Ռուսաստանի կողմից Ղրիմում և Ուկրաինայի այլ տարածաշրջաններում իրավիճակի սրման նվազեցմանն ուղղված քայլեր չձեռնարկելու դեպքում «Յոթյակը» նախատեսում է դիմել ինչպես առանձին, այնպես էլ միասնական հետագա քայլերի:
