Այսօր ՀՀ էկոնոմիկայի նախարարությունում կայացավ «ԵՄ-ՀՀ համագործակցություն. Եվրոպական հարևանության և գործընկերության գործիքի ներկայացում» թեմայով համաժողովը, որից առաջ ՀՀ-ում ԵՄ պատվիրակության ղեկավար Տրայան Հրիսթեան պատասխանեց լրագրողների հարցերին:
Նա նշեց, որ ՀՀ-ԵՄ համագործակցության ճանապարհին շատ կոնկրետ գործիքներ են որդեգրելու, այդ թվում՝ այն գործիքները, որոնք թույլ կտան, որ իրենց հայ գործընկերների հետ կարողանան Վիլնյուսի գագաթնաժողովում ձեռք բերված համաձայնությունները և հայտարարությունն ի կատար ածել և կյանքի կոչել:
«Ես կընդգծեի, որ սա պարզապես մի մասն է տեխնիկական աջակցության, կարող եմ ասել, որ մեր վիլնյուսյան համաձայնությունների շրջանակներն ավելի մեծ են, քան Սիգմայի, Տաեքսի ու Թվինինգի: Մենք փաստորեն քննարկելու ենք ընթացակարգային խնդիրներ, թե ինչպես պետք է առաջ ընթանալ սեպտեմբերի 3-ին ՀՀ-ի կողմից կայացված որոշումից հետո: Մենք արդեն ունենք ՀՀ-ԵՄ գործընկերության և համագործակցության համաձայնագիր, և ինչպես ասացի, փորձելու ենք Վիլնյուսյան համաձայնագրերը կյանքի կոչել՝ հատկապես գործողությունների ծրագիրը»,- ասաց նա:
Հարցին՝ ԵՄ-ն ի՞նչ բյուջե է սահմանել Հայաստանի համար այս տարի, նա պատասխանեց, որ ավելի ճիշտ է այս իրավիճակում տեսնել, թե համագործակցությունն ինչ ոլորտներում կարող է կայանալ, քանի որ բյուջետավորման գործընթացը չի ավարտվել, և ձեռնպահ կմնա պատասխանելուց:
Դիտարկմանը՝ եթե Ուկրաինայի դեպքում ԵՄ-ն առաջարկում է ստորագրել ԱՀ-ի քաղաքական մասը, հնարավո՞ր է Հայաստանի դեպքում էլ նման բան առաջարկի, ասաց, որ պետք չէ համեմատել: «Ուկրաինայում պարզապես կար ժամանակային տարանջատում»,- նշեց նա:
