Ֆրանսիացի աշխարհահռչակ շանսոնիե Շառլ Ազնավուրին պատկանող արվեստի ստեղծագործությունները կվաճառեն Փարիզում կայանալիք աճուրդում: Ինչպես հայտնել Է Le Figaro թերթը, աճուրդը, որը կազմակերպում Է Christie՚s տունը, կկայանա հունիսի 4-ին։
Աճուրդի կդրվեն երկու բրոնզե քանդակներ: Առաջինը ֆրանսիացի նկարիչ Ժերմեն Ռիշիեի (1902 – 1959) գործն Է, որն ստեղծվել Է 1953 թվականին եւ պատկերում Է ցլամարտիկի եւ ցուլի գանգ: Այդ քանդակը Ռիշիեի 11 գործերից բաղկացած շարքի մի մասն Է, որոնք նվիրված են ցլամարտի թեմային: Նրա մյուս գործերը պահվում են Նյու Յորքի Գուգենհայմի ֆոնդում եւ Բրյուսելի Գեղեցիկ արվեստների թագավորական թանգարանում: Փորձագետները քանդակի արժեքը գնահատում են 2,5 միլիոն եվրո:
Ազնավուրի հավաքածուի եւս մեկ գործ Սեզար Բալդաչինիի «Տեսկոնիի տախտակը» քանդակն Է, որն ստեղծվել Է 1958 թվականին: Լոտի նախնական արժեքը կազմում Է 60 հազարից մինչեւ 80 հազար եվրո:
Ավելի վաղ Ֆրանսիայում կայացած աճուրդում վաճառվել Է այն ավտոմոբիլը, որը շանսոնիեն գնել Է 1966 թվականին: Աճուրդը տեղի Է ունեցել փետրվարի 7-ին Գրան պալե ցուցահանդեսային պալատում։
