Այսօր Հայաստանում ԵՄ պատվիրակության ղեկավար, դեսպան Տրայան Հրիսթեայի և ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանի մասնակցությամբ բացվեց Վերաինտեգրման ուղղորդման կենտրոնը: Կենտրոնը հիմնադրել է Եվրամիության կողմից ֆինանսավորվող «Թիրախային նախաձեռնություն Հայաստանի համար» ծրագիրը: Ծրագրին կարող են դիմել ՀՀ այն քաղաքացիները, ովքեր առնվազն 1 տարի ապրել են եվրոպական որևէ երկում և վերադարձից հետո առնվազն կես տարվա ընթացքում դիմել են կենտրոն աջակցություն ստանալու համար: Եգանյանի խոսքով, կարող են լինել բացառիկ դեպքեր, երբ քաղաքացիները ավելի ուշ դիմած լինեն կենտրոն, սակայն այդ դեպքն առանձին կքննարկվի, և նրանք նույնպես կներառվեն ծրագրում ու կկարողանան աջակցություն ստանալ: Աջակցության ձևը յուրաքանչյուր դիմողի համար, Եգանյանի խոսքով, անհատական է և կախված է նրանից, թե դիմող քաղաքացին ի՞նչ բնագավառում է ցանկանում ներառվել՝ բիզնես, կրթական և այլն:
«Առաջին լրատվական»-ը ԵՄ պատվիրակության ղեկավար, դեսպան Տրայան Հրիսթեայից հետաքրքրվեց՝ հնարավո՞ր է Հայաստանի՝ ՄՄ-ին անդամակցման փաստը որևէ կերպ խոչընդոտի ծրագրի հետագա իրականացմանն ու ֆինանսավորմանը: «Ծրագիրը մեկնարկել է 1 տարի առաջ ևտևելու է ևս երկու տարի: Ծրագիրը վերաբերում է շարժունակության ոլորտում գործընկերության իրականացմանը: Ես չգիտեմ՝ արդյոք Մաքսային միությունը մասնակի՞ց է այս ծրագրին: Այս ծրագիրի իրականացումը որևէ առնչություն չունի Մաքսային միությանը Հայաստանի անդամակցման հետ»,- ասաց դեսպանը:
«Առաջին լրատվական»-ը Գագիկ Եգանյանից հետաքրքրվեց՝ ի՞նչ է ակնկալվում ծրագրի ավարտից հետո, ծրագիրը կարո՞ղ է նպաստել ներգաղթին, և ծրագրի ցուցաբերած օգնությունը բավարար կլինի՞, որպեսզի Հայաստան վերադարձած քաղաքացին ցանկանա շարունակել մնալ Հայաստանում: «Ծրագրի արդյունքում 1600 վերադարձող անձ տարբեր բաղադրիչներով կստանան օգնություն: Այդ 1600-ը հավասարապես բաշխված է. ասենք, բիզնեսին աջակցություն կստանա այսքան անձ, երեխաների կրթության համար՝ այդքան անձ: Բացառիկ դեպքերում կա նաև ծածկի ապահովման բաղադրիչ:
Հատկացված օգնությունը բավարար կլինի՞, թե՞ ոչ, պետք է նրանց հարցնել: Բայց կարծում եմ, որ տրամադրվելիք օգնությունը բավարար կլինի, որ իրենք մտածեն իրենց ապագան Հայաստանում կազմակերպելու մասին»,- ասաց Եգանյանը:
