Անկախության տարիներին դրսևորված չվերահսկվող ագահությունը սկսել է բնաջնջել Հայաստանի բնապահպանությունը: Այսօր տեղի ունեցած մամուլի ասուլիսի ժամանակ այս մասին ասաց բնապահպան Կարինե Դանիելյանը:
«Հանքարդյունաբերությունն էքստենսիվ կերպով անցնում է մեր երկրով: Եթե հանքերը պահպանվող տարածքներում են՝ ոչինչ, ջրային գոտիներում են՝ կրկին ոչինչ: Այ, այսպես էլ էկոլոգիան բնաջնջելով առաջ ենք գնում: Այսօր արդեն 150 փոքր ՀԷԿ-եր ունենք: Փոքրիկ, սեզոնային գետակներից յուրաքանչյուրի վրա 8-9 ՀԷԿ կա: Իսկ ամեն նոր ՀԷԿ-ի դեմ պայքարում են և բնապահպանները, և տեղի բնակավայրերի բնակիչները»,- ասաց նա:
Կարինե Դանիելյանի խոսքով՝ բնապահպանական ճգնաժամային վիճակը գնահատելու համար բավական է նայել Երևանի վերջին կառուցապատմանը: «Որտեղ հնարավոր է՝ հրեշավոր բարձրահարկ շենքեր ենք խցկում: Մեկ այլ խնդիր է անապատացման հարցը, որը լուծելու համար Սևանից հավելյալ ջուր են բաց թողնում»,- ասաց բնապահպանը:
Ասուլիսի մյուս բանախոս՝ ԱԺ պատգամավոր Լյովա Խաչատրյանն էլ իր հերթին նկատեց, որ խորհրդային տարիներին մարդիկ պետական մտածողություն ունեին, ինչը չես ասի մեր օրերի մասին, երբ մարդիկ մտածում են միայն անձնական շահի մասին:
«Հանքարդյունաբերության թույլտվության համար ոչ մի ուսումնասիրություն չի անցկացվում: Միայն որոշակի գործընթացներից հետո ենք տեսնում՝ ինչ հետևանքներ է ունենում հանքերի շահագործումը: Այսպես մենք կորցնում ենք մեր բնական հարստությունները: Գնալով ավելի ու ավելի մեծ ազդեցություն ենք ունենում էկոլոգիայի վրա, ինչն անդառնալի հետևանքներ է ունենալու»,- ասաց նա:
ԲՀԿ պատգամավորը հավաստիացրեց, որ ինքն անձամբ ԱԺ ամբիոնից բարձրաձայնում է խմելու և ոռոգման ջրերի հարցը:
«Բայց սայլը տեղից չի շարժվում: Մենք ջրօգտագործման հստակ ռազմավարություն չունենք: Բյուջեից հատկացումներ են անհրաժեշտ, ինչը, սակայն, չի արվում: Մենք ուշացնում և ուշացնում ենք մեր քայլերը:
Իսկ Թուրքիան, օրինակ, Արաքսի վրա բազմամիլիոնանոց արժեքով ՀԷԿ է կառուցում, ինչի արդյունքում այսօր արդեն իսկ զգում ենք Արաքսի ջրերի նվազման միտումը»,- ասաց Լյովա Խաչատրյանը` հավելելով, որ մի քանի օրից ինքը շրջանառության մեջ է դնելու Արարատյան դաշտի ջրօգտագործման մասին նոր օրինագիծ:
«Մի քանի տարի հետո նավթադոլարներ ասածին կփոխարինեն ջրադոլարները»,- ամփոփեց նա:
