Լրագրողների ուշադրությունից չի վրիպել այն, որ ՀՀ երկրորդ նախագահ Ռոբերտ Քոչարյանը հանդիպում է ունեցել իր աջակիցների հետ, ելույթ է ունեցել, խոսել ապագա ծրագրերի մասին: Դատելով այդ երևույթից՝ Մարտի 1-ի գործով մեղադրվող նախկին նախագահը հավակնում է ձևավորել քաղաքական դիմադրության նոր բևեռ՝ հավանաբար հենց իր գլխավորությամբ: Ի՞նչ հաշվարկներ են դրված այդ նախաձեռնության հիմքում: Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Ժաննա Ալեքսանյանը, քաղաքագետ Էդգար Վարդանյանը, վերլուծաբան Աղասի Մարգարյանը:
«Հանդիպումը փակ ձևաչափով է տեղի ունեցել, այն հանրային միջոցառում չէր, այլ բեմադրություն էր՝ ցույց տալու համար, որ ունի աջակիցներ, անկաշկանդ մթնոլորտ է և ինքը շփվում է մարդկանց հետ, որ հանդարտ, կառուցողական պայքարի ոգի կա և այլն: Այսինքն՝ սա զուտ փիարի համար արված նախաձեռնություն է: Կարծում եմ՝ սա նաև փորձ է ուժի ցուցադրության. այս ամենը նպատակ ունի պատրանք ստեղծել, որ լուրջ դիմադրություն է հասունանում, և նպատակ ունի պանիկա առաջացնել»,- նշեց Է. Վարդանյանը՝ հավելելով, որ այսօր հակահեղափոխություն անելու որևէ շանս չկա. միակ տարբերակը հակասահմանադրական գործողություններն են, բայց Հայաստանում դա հիմա շատ քիչ է հավանական:
Ժաննա Ալեքսանյանի դիտարկմամբ՝ Քոչարյանն ավելի շատ իր վեցամսյա կալանքի համար վրեժխնդիր լինելու մղումներ ունի, քան թե որպես քաղաքական գործիչ հանդես գալու: «Այս մարդը պատասխանատվություն չի ունեցել մեր երկրի նկատմամբ և այդ ձևով էլ ուզում է առաջ գնալ: Քոչարյանի հավաքի մասնակիցներն այն մարդիկ են, ովքեր նրա հետ լավ օրեր են ապրել: Սա հեռանկար չունեցող հավաք էր, Քոչարյանը չի գտնի հանրային աջակցություն, իսկ առանց դրա ոչինչ չի կարող անել»,-նշեց իրավապաշտպանը:
Ուշադրություն դարձնելով Քոչարյանի ապագայի նախագծերին՝ Աղասի Մարգարյանը կարծիք հայտնեց, որ Քոչարյանն իր հարցազրույցներում խոսել է քաղաքականություն մտնելու մտադրության մասին, բայց եթե սթափ դատենք, տեսանելի է, որ հարցազրույցներից այն կողմ նա ոչինչ չի արել քաղաքական գործունեություն ծավալելու առումով: Վերլուծաբանը նաև հավելեց, որ, անշուշտ, ինչ-որ հաշվարկներ ունի Քոչարյանը՝ այս հավաքը կազմակերպելով:
Ժ. Ալեքսանյանը հավելեց, որ Քոչարյանը հանրային պաշտպանվածության կարիք է զգում հետագայում դատական պրոցեսում ավելի վատ ելքերից խուսափելու համար, և նա հիմա հենց այդ հաշվարկն ունի:
Մանրամասն՝ տեսանյութում:
