«Ես կարծում եմ, որ Գագիկ Հարությունյանի վրա հասարակական մեծ ճնշում կար, որովհետև վերջին իրադարձությունները ավելի ակնհայտ դարձրին, որ դատական համակարգում որևէ բան չի փոխվել հեղափոխությունից հետո»,- Բարձրագույն դատական խորհրդի նախագահ Գագիկ Հարությունյանի հրաժարականի առնչությամբ «Առաջին լրատվական»-ի հետ զրույցում ասաց քաղաքագետ Արմեն Վարդանյանը:
Նրա խոսքով՝ շատ կարևոր է, որ իշխանության մյուս ճյուղերում տեղի ունեցած փոփոխությունները նաև տեղափոխվեին դատական համակարգ. «Իսկ Գագիկ Հարությունյանը երկար տարիներ եղել է Հայաստանի արդարադատության համակարգը և պետականությունը բռնաբարող մի անձ: Նա, լինելով ՍԴ նախագահ, իր ոչ միանշանակ որոշումներով նպաստել է Հայաստանում ժողովրդավարության թուլացմանը, բռնապետական համակարգի զարգացմանը: Այնպես որ՝ Գագիկ Հարությունյանի հեռանալը ԲԴԽ նախագահի պաշտոնից դեռ մի բան էլ ուշացած է. նա պետք է թավշյա հեղափոխությունից անմիջապես հետո հրաժարական տար: Նա կարող է հանգիստ գնալ թոշակի և գրքեր գրել՝ մանավանդ, որ շատերը նրան գովում են որպես գիտնական»:
Քաղաքագետ Սարո Սարոյանն էլ հավելեց. «Այն գործընթացի մեջ, որ հիմա կատարվում է Հայաստանում, Գագիկ Հարությունյանը երբեք չէր կարող մտնել, որովհետև նա ցույց է տվել, որ իր 30 տարվա գործունեության ընթացքում երբեք չի մտել հակամարտության մեջ և միշտ գործել է կուլիսներում, ստվերային»:
Մեր զրուցակցի խոսքով՝ Գագիկ Հարությունյանը շատ լավ հասկանում էր՝ որտեղ կա ուժ, որտեղ կա թուլություն. «Այնպես որ՝ ես շատ բնական եմ համարում այդ հրաժարականը: Այսինքն՝ այնտեղ, որտեղ նա ուժեղ էր, այդ դաշտում ծավալվելու հնարավորություն նա այլևս չուներ»:
Ինչ վերաբերում է ՍԴ նախագահ Հրայր Թովմասյանի հեռանալուն, Արմեն Վարդանյանը կարծում է, որ դա շատ դժվար կլինի. «Քանի որ նա ինքն իրեն ցմահ ապահովագրել է այդ պաշտոնում՝ իր իսկ գրած Սահմանադրությամբ: Միակ ճանապարհը ուժեղ հանրային ճնշումն է: Եթե նա հասկանում է հասարակության տրամադրությունները, կարողանում է շոշափել հասարակության զարկերակը, ապա պետք է գնա այդ քայլին, որով նաև մեծ նպաստ կբերի հայկական ժողովրդավարության հաղթանակին»:
Հարցազրույցն ամբողջությամբ՝ տեսանյութում:
