Մարտի 8-ի առթիվ առողջապահության նախարար Դերենիկ Դումանյանն այսօր այցելեց «Գրիգոր Լուսավորիչ» բժշկական կենտրոն՝ շնորհավորելու վերջին մի քանի օրերին մայրացած կանանց: Նախարարը իր հետ տարել էր նվերներ, որոնք բաժանեց մայրիկներին, նրանց մաղթեց առողջություն, հորդորեց հոգ տանել իրենց առողջությանը:
«Առաջին լրատվական»-ի հետ զրույցում հիվանդանոցի մանկաբարձ-գինեկոլոգ Կարմելա Հարությունյանն ասաց, որ վերջին շրջանում երիտասարդ զույգերն ավելի հաճախակի են գալիս ստուգման. «Նրանց մոտ հիմնականում բորբոքային պրոցեսներ են հայտնաբերվում, ստանում են համապատասխան բուժում և հետագայում առողջ երեխա ունենում»:
Մենք զրուցեցինք նաև օրեր առաջ մայրացած կանանց հետ, ովքեր մեզ հետ զրույցում կիսվեցին իրենց զգացողություններով, նշեցին, որ մայրանալով՝ կյանքին նոր աչքերով են սկսել նայել:
Նրանցից Արևիկ Վարդանյանը մեզ հետ զրույցում անկեղծորեն ասաց, որ մայրանալուց հետո շատ բան է մարդ հասկանում ու շատ բան է զգում, նշեց նաև, որ Հայաստանի պայմաններում դժվար է երեխա պահելը. «Հայաստանի պայմաններում երեխա ունենալը դժվար է, ներկա պահին մեկի մասին եմ մտածում, երկրորդի, երրորդի մասին չեմ մտածում»:
Մանրամասները դիտեք տեսանյութում:
