Երեկ Սյունիքի նախկին մարզպետ Սուրեն Խաչատրյանը երկար լռությունից հետո անդրադարձավ հունիսի 1-ին իր տան մոտ տեղի ունեցած ողբերգական իրադարձությանը: Լրագրողների հետ զրույցում նա նշեց, որ տեղի ունեցածը ահավոր ողբերգություն էր և՛ Բուդաղյանների, և՛ իր ընտանիքի համար:
Սյունիքի նախկին մարզպետը կատարվածը բնորոշեց որպես խմիչքի հետևանք, որը բերեց այս ողբերգությանը: Նա նաև նշեց, որ ջերմ հարաբերություններ են եղել այդ ընտանիքների միջև այս քսանհինգ տարիների ընթացքում, չնայած, ճիշտ է, եղել են քաղաքական խնդիրներ. «Նույն Ավետիքը դրել է Գորիսի քաղաքապետի թեկնածություն, և ես երկու անգամ էլ ուրիշին եմ պաշտպանել: Եվ երկու անգամ իր չանցնելը նա կապել է ինձ հետ, և վերջում ես հասկացա, որ իր մեջ կուտակված թշնամանք կա, և անպայման ինքը ինչ-որ բանով ուզում էր պատասխանել: Այդ երկու օրվա ջերմ հարաբերությունը, որին բավականին մարդիկ էին ներկա… կարծում եմ՝ այդ ամենից հետո այդ քայլին չպետք է գնար, բայց համենայնդեպս, փորձագետների եզրակացությունը այսպիսին էր՝ Ավետիքի խմածության աստիճանը մեծ էր՝ 6.7 պրոմիլ:
Հավատացնում եմ` փորձագետների կարծիքն այնպիսին էր, որ այդ խմածության աստիճանում մարդը նույնիսկ կարող է մահանալ: Իր մեջ այնքան կուտակված թշնամություն կար, որ ամբողջ ճանապարհին, մեզ իջեցնելուց հետո, իրեն մեկ ուրիշը վերցնում է, տանում տուն, իրար հետ փաթաթվում են, ջան-ջիգյարով խոսում, բայց այդ մարդու մեջ թշնամանքն այնքան, այն աստիճան մեծ էր, որ գնում տնից զենքերը վերցնում է, և ցավալին այն է, որ ընտանիքի անդամները, իր ծնողները չեն ասում՝ գիշերվա կեսին, քեֆդ լավ՝ ո՞ւր ես գնում»:
Իսկ մեքենայի մեջ թե ինչ զրույց է եղել` Սուրեն Խաչատրյանը հստակ պատասխանեց չտվեց, միայն ասաց. «Մեքենայի մեջ ընդամենը իր հարբածության աստիճանն էր, որ ինքը իրեն չկարողացավ դրսևորել, ես էլ իրեն իջեցրի: Իր պահվածքից ելնելով՝ վարորդին ասացի՝ կանգնեցրու, թող իջնի»:
Բուդաղյանների մի խումբ հարազատներ, ովքեր դիտել են տեսանյութը, համոզված են, որ Սուրեն Խաչատրյանը հարցազրույցի ժամանակ ոչ ադեկվատ վիճակում էր: Ավելին` այն միտքը, թե Սուրեն Խաչատրյանի համար կատարվածը ողբերգություն էր, հարազատներին վրդովվեցնում է, երբ հիշում են՝ ինչպես էր Սուրեն Խաչատրյանը որդուն ազատելուց հետո աչքալուսանքի արարողություն կազմակերպել:
Բուղադյանների բարեկամները վստահ են, որ խոսելով Ավետիք Բուդաղյանի խմածությունից` Սուրեն Խաչատրյանն ընդամենը փորձել է արդարանալ. «Թե՛ Ավոյի կինը, թե՛ հայրը փաստում են, որ Ավոն եկել է տուն հավասարակշիռ վիճակում, խոսել է բոլորի հետ, ապա գնացել աշխատավայր: Ավոն այդ ժամանակ վատառողջ էր և, ինչպես գիտեք, կաթիլային էր ընդունում, ինչպե՞ս կարող էր խմած լինել, և Լիսկա կոչեցյալը իրավունք չունի մեղադրանքներ հնչեցնելու Ավոյի ծնողների հասցեին` այն դեպքում, երբ գիտենք, թե ինչ հայր է ինքը, ինչ անդաստիարակ որդիներ ունի»,- «Առաջին լրատվական»-ին երեկ ասացին Բուդաղյանների բարեկամները՝ հավելելով, որ Ավետիքը այդ օրը շատ սթափ վիճակում է եղել:
Ավելին, նրանց խոսքով, Սուրեն Խաչատրյանի ողջ տոհմը հիմա Գորիսում զբաղվում է թմրանյութեր բաժանելով: Նրանք պատմեցին, որ երկու ամիս առաջ Սուրեն Խաչատրյանի եղբորորդու՝ Էրիկ Խաչատրյանի տնից վեցերորդ վարչությունը մեծ քանակությամբ հերոին է հայտնաբերել, նրան ձերբակալել են, սակայն Սուրեն Խաչատրյանը դարձյալ ազատել է եղբորորդուն:
Ինչ վերաբերում է Սուրեն Խաչատրյանի հնչեցրած այն մտքին, որ Ավետիքը տարիների կուտակած վրեժխնդրություն ուներ, քանի որ երկու անգամ քաղաքապետի ընտրություններին իր թեկնածությունն է դրել, իսկ ինքը չի սատարել, հարազատները բացառեցին, համարեցին անհեթեթություն, քանի որ Ավետիքը երբեք իշխանության չի ձգտել: Ավելին` նրանք ամոթալի են համարում նախկին մարզպետի այն խոսքերը, որ իր սանիկին չի սատարել: Իսկ Ավետիքը թեկնածությունը դնելիս մեկ նպատակ է ունեցել՝ ժողովրդի հոգսը թեթևացնել, ժողովրդի մասին հոգ տանել, իր քաղաքը զարգացնել:
Նրանք պատմեցին, թե ինչ զրույց է տեղի ունեցել Գորիսի ճանապարհին Սուրեն Խաչատրյանի և Ավետիք Բուդաղյանի միջև. «Ավոյին ասել է՝ ինչ ես գնում էդ թուրք շների համար շինարարություն անում (նկատի ունի Ավետիք Բուդաղյանի՝ ԼՂՀ-ում իրականացվող շինարարությունը), արի ինձ հետ կիսվիր բիզնեսովդ: Ցարը ես եմ, դու ինձ հետ պիտի տալիք-առնելիք ունենաս: Լիցկան իր բիզնեսի կեսը մուրացել է և այդպես հարստացել»:
Իսկ այն կապակցությամբ, որ Սուրեն Խաչատրյանն ասել էր, թե ճանապարհին խոսել են Ավետիքի հետ, բարեկամները նշեցին, որ Սուրեն Խաչատրյանի փաստաբանն է ասում, որ ավտոմեքենայի մեջ Սուրեն Խաչատյանը քնած է եղել, ինչը, փաստորեն, հակասություն է առաջացնում Սուրեն Խաչատրյանի խոսքում: Նրանք անհնար են համարում նաև այն, որ կրակոցների պահին Սուրեն Խաչատրյանը քնած է եղել, քանի որ եթե գետի ձայնը լսվում է հերմետիկ պատուհանների արանքից, ուրեմն կրակոցները միանշանակ կլսվեին:
Նրա որդին, բարեկամների խոսքով, Ավետիքենց գնացած պահին թմրանյութերի ազդեցության տակ է եղել: «Նրանք իմացել են, որ Ավոյենք գնալու են, ավելին՝ նրանց հրահրել են, զանգել են, հայհոյել, կանչել: Ավոյենք, երբ հասել են, հարցրել են Լիսկային, իսկ Լիսկան իր որդուն է առաջ մղել: Այսինքն՝ կանչել է, տարել, բայց խիզախություն չի ունեցել դուրս գալու: Մեր տղաները միակն են, որ չեն թուլացել նրա սպառնալիքներից»,- պատմեցին նրանք՝ հավելելով, որ Ավոն նստել է Սուրեն Խաչատրյանի մեքենան, քանի որ նա է կանչել ասել՝ խոսելու բան կա:
Նրանք վստահ են, որ Սուրեն Խաչատրյանի մեջ նախանձն է խոսել, քանի որ տեսել է, որ Ավոն ամեն ինչի հասել է իր սեփական քրտինքով, իսկ ինքը բոլորին թալանելով:
Նրանք անդրադարձան նաև Սուրեն Խաչատրյանի այն հիմնավորմանը, թե նախկինում ավելի հարուստ է եղել. «Այդ դեպքում ինչու մեծ տներ սկսեց կառուցել մարզպետ դառնալուց հետո, երբ մինչ այդ ընդամենը ATK շենքի մեկսենյականոցում էին մնում:
Նրանք այն կարծիքի են, որ այս հարցազրույցում Սուրեն Խաչատրյանը փորձել է հրահրել Բուդաղյանների ընտանիքին:
