«Որևէ վեճ ՀՀ գյուղատնտեսության նախարարության և «Մուլտի Ագրոյի» միջև գոյություն չունի, այդ թվում՝ դատական»,- ի պատասխան «Առաջին լրատվական»-ի հարցին՝ պատասխանեցին ՀՀ գյուղատնտեսության նախարարությունից:
Նշենք, որ ըստ լրատվամիջոցներից մեկի հրապարակման՝ ՀՀ գյուղատնտեսության նախարարությունը դատական հայց է ներկայացրել ընդդեմ «Մուլտի Ագրո» ընկերության՝ պետությանը ընկերության կողմից կուտակած պարտքերի պատճառով:
Տիկին Ծառուկյանն էլ հերքել էր, թե ինքը որևէ պարտք ունի, և այդ դատական հայցն ու նմանատիպ գործողությունները պայմանավորել էր որդու՝ ԲՀԿ նախագահ Գագիկ Ծառուկյանի գործոնով:
«Ցանկանում են Գագիկ Ծառուկյանին զայրացնել, բայց ոչ մի բան չի ստացվի: Այս ամենը կապված է իմ որդու իմիջի հետ»,- ասել է տիկին Ռոզան:
Բայց պարզվում է՝ որևէ դատական վեճ էլ չկա, դատարանում որևէ հայց չկա ընդդեմ «Մուլտի Ագրո» ընկերության: Հավանաբար «Արարատցեմենտ» գործարանի շուրջ վերջերս բարձրացված աղմուկի արդյունքներն այնքան ոգևորիչ են եղել, և որոշում է կայացվել նոր սցենար մշակել, որտեղ կարմիր գծով կանցնի այն միտքը, թե իշխանությունները այնքան են ազդվել ԲՀԿ համագումարում կրտսեր Ծառուկյանի հնչեցրած ելույթից, որ նրանք սկսել են քաղաքական հետապնդումների ենթարկել Ծառուկյաններին:
Նշենք, որ ամիսներ առաջ իրապես սրված էին Ռոզա Ծառուկյանի և գյուղնախարար Սերգո Կարապետյանի հարաբերությունները: Տիկին Ռոզան նեղացել էր, որ ֆերմերների օրվա կապակցությամբ Սերգո Կարապետյանը չէր պարգևատրել իր ֆերմերներին: Տիկին Ռոզայի վրդովմունքն այն աստիճանի էր սրվել, որ նա հայտարարել էր, թե համագումար է անելու և հրաժարվելու է Հայ ֆերմերների միության նախագահի պաշտոնից: Սակայն օրեր անց մտքափոխվել էր, իսկ Ամանորից առաջ նա նույն գյուղնախարարի կողմից պարգևատրվեց ոսկե մեդալով, ապա ֆերմերների միության համագումարում կրկին վերընտրվեց միության նախագահ:
Դրանով, ըստ էության, վերջ դրվեց գյուղնախարար-Ռոզա Ծառուկյան լարվածությանը: Ռոզա Ծառուկյանը հայտարարեց, որ այլևս նեղացած չէ գյուղնախարարից:
