Մարկ Ցուկերբերգը՝ Facebook ընկերության ղեկավարը, որի կազմում, բացի համանուն սոցցանցից, մտնում են նաև Instagram-ը, WhatsApp մեսենջերը և այլ ծառայություններ, դեմ է արտահայտվել դրա տրոհմանը:
Ավելի վաղ New York Times-ը հրապարակել է սոցիալական ցանցի համահիմնադիր Քրիս Հյուզի հոդվածը, որում նա կոչ է արել բաժանել Facebook ընկերությունը նրա սեփականատիրոջ զգալի ազդեցության պատճառով՝ մասնավորապես ընտրողների տրամադրության վրա: Բացի այդ, Հյուզը արտահայտվել է տեխնոլոգիական սեկտորում հօգուտ վերահսկիչ մարմնի ստեղծման:
«Երբ ես կարդացի նրա գրածը, նախևառաջ մտածեցի, որ նրա առաջարկը չի օգնի լուծել խնդիրները: Կարծում եմ՝ եթե ձեզ մտահոգեին ժողովրդավարությունն ու ընտրությունները, ապա կցանկանայիք, որ լիներ այնպիսի ընկերություն, ինչպիսին մերն է, որը կարողանում է տարեկան միլիարդավոր դոլարներ ներդնել ընտրությունների միջամտությանը դիմակայելու գործում նորագույն միջոցների մշակման համար»,- հայտարարել է Ցուկերբերգը France Info-ին տված հարցազրույցում:
Միաժամանակ Facebook-ի սեփականատերը նշել է իրական խնդիրների առկայությունը, որոնք վերաբերում են վնասակար կոնտենտին:
