«Այգ» հոգեբանական կենտրոնի գլխավոր մասնագետ, հոգեբան Ռուբեն Պողոսյանի խոսքերով՝ արտագաղթի մեջ մեղավոր է ոչ միայն իշխանությունը , այլև ընդդիմությունը:
«Այն առումով, որ ընդդիմությունը խոստումներ էր տալիս, շատ համոզիչ էր կարողանում ցույց տալ իր պայքարի ձևերը, որ ամեն ինչ արմատապես կփոխվի հօգուտ ժողովրդի: Սակայն ժողովուրդը կրկնակի խաբեություն ապրեց, քանի որ գնացել էր նրանց հետևից և սպասումներ ուներ»,- հիմնավորեց հոգեբանը:
Նրա համոզմամբ՝ մենք ոչ միայն սիրում ենք արտագաղթել, այլև շենացնել ուրիշի երկիրը: Բացի այդ, մենք վստահություն չունենք մեր պետականության, սեփական երկրի հանդեպ: Այդ վստահությունն ենք մշտապես կորցնում: Իսկ արտերկրներում մեր կարողությունները կարողանում ենք դրսևորել, սպասումներն արդարացնել և գնահատվել: Այսօր դուրսը շենացնելու հոգեբանություն է ստեղծվել: Իսկ պատճառները շատ են` չունենք մասնագիտացված աշխատաշուկա: Բարձրագույնավարտը տաքսիստ է դառնում կամ սևագործ աշխատանք կատարում և, չբավարարվելով իր կատարած աշխատանքից, օտարանում է ու հեռանում: «Մարդու իրավունքների ոտնահարումը ևս նպաստավոր պայմաններ է ստեղծում արտագաղթի համար: Պետությունը մարդու թիկունքին չի կանգնում, դեմքով հակառակ է կանգնում քաղաքացուն, ինչը մեր երկրի մեծագույն խնդիրներից մեկն է: Ես նորաստեղծ ընտանիքների հետ եմ աշխատում, որոնք չեն ուզում, որ իրենց երեխան ապրի այս երկրում, որովհետև շատ անպաշտպան կլինի: Հետևաբար՝ արտագաղթի ճանապարհն են բռնել ու բռնում»,- եզրափակեց հոգեբանը:
