Պարտադիր չէ, որ ինչ ընդդիմությունը ներկայացնում է, իշխանությունը պետք է ընդունի։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հովիկ Աղազարյանը՝ անդրադառնալով նրան, որ «Լուսավոր Հայաստան» խմբակցության օրենսդրական նախաձեռնությունները կառավարությունը մերժել է։
«Մենք ականատես ենք եղել դեպքերի, երբ կառավարությունը որոշ նախագծեր ընդունել է և Ազգային ժողովն էլ է ընդունել։ Այնպես որ իրավիճակը ծայրահեղացնել պետք չի։ Ես կարծում եմ, որ որոշակի սուր եզրերը, որ այսօր գոյություն ունեն մասնավորապես ԱԺ-ում իշխող ուժի և ընդդիմադիր ուժերի միջև, կամաց-կամաց կհարթվեն և էլ ավելի կառուցողական մթնոլորտ կձևավորվի ԱԺ-ում։ Այն, ինչ տեղի է ունենում Ազգային ժողովում, երբեմն պահի կամ զգացմունքների ազդեցության տակ դրսևորվող երևույթներ են, որոնք պետք է հարթվեն»,-ասաց Աղազարյանը։
Դիտարկմանը, որ կառավարության նիստում վարչապետը նշեց, որ «Լուսավոր Հայաստանի» նախագիծը հեշտացնում է բարձրաստիճան պաշտոնյաների հանդեպ ահաբեկչության իրականացումը, «Իմ քայլի» պատգամավորն արձագանքեց. «Վարչապետը քննարկման ժամանակ կարող է արտահայտել իր կարծիքը, եթե բաց է նկատել, ինչո՞ւ չպետք է այդ մասին ասի»։
