Ոչ մի հեղափոխական իրադրություն չի կարող առաջանալ, եթե չկան նախապայմաններ, հիմքեր, առիթներ: Մարտի 4-ին լրագրողների հետ հանդիպմանը նման տեսակետ հայտնեց քաղաքական վերլուծաբան Սարո Սարոյանը:
«Մենք գիտենք, որ արաբական գարնան սկզբնաղբյուրը կրկին ու կրկին բռնապետական վարչակարգերն էին, որ կային Թունիսում, Եգիպտոսում, որտեղ ոտքի կանգնեցին հանրույթները: Ոչ իրավական վարչակարգեր են հետխորհրդային երկրներում, և այսօր այդ տեսանկյունից բռնկվել է Սևծովյան տարածաշրջանը:
Իհարկե, զարգացումներն անկանխատեսելի են, սա է յուրահատուկ իրավիճակը, եթե արաբական գարնան համար ոչ ոք չէր կարող շատ մեծ տեղ տալ, որ արաբական հանրույթները կարող են քաղաքակրթական նորամուծության գնալ, աշխարհին դեմ գնալով քայլեր ձեռնարկել, ապա Ուկրաինայի դեպքում այլ է իրավիճակը»,- ասաց նա:
Սարոյանի խոսքով՝ Ուկրաինայի վերջին օրերի իրադարձությունները թույլ են տալիս պնդել՝ իրապես մի նոր սուբյեկտ է ի հայտ եկել՝ տարածաշրջանային կկոչվի դա թե աշխարհաքաղաքական: Այդ սուբյեկտը Մայդանն է, որը կարողացավ իր ուզած հունով տանել Ուկրաինայում կառավարական լծակներին տիրացած վարչախմբին հեռացնելու գործը և հաշվի չնստեց աշխարհաքաղաքական ուժերի, Ուկրաինայի ներսում քաղաքական ուժերի հետապնդած նպատակների կամ մեթոդաբանության մեխանիզմների, շահերի հետ, կարողացավ պնդել ու հաստատել իր սուբյեկտայնությունը:
«Սա նոր իրավիճակ է այն առումով, որ բոլորովին նոր սուբյեկտ է հանդես եկել, ինչպիսին չկար արաբական երկրներում, այնտեղ, որտեղ հեղափոխություն էր: Բոլորը հասկանում են, որ, ի վերջո, պետք է հաշվի նստել Մայդանի հետ: Իհարկե, Մայդանի մասին խոսելիս պետք է հաշվի առնել, որ Յանուկովիչի հեռանալուց հետո որոշ հանրային զանգվածներ հանգստացել են, այսինքն՝ այն կոնսոլիդացիան, որ կար Մայդանում նախքան այդ, այսօր մի փոքր թուլացել է, բայց սուբյեկտայնությունը շարունակում է պահպանել»,- նշեց նա:
Փորձագետի խոսքով՝ ստեղծված իրավիճակում եղավ ՌԴ կոշտ արձագանքը, որը գտավ՝ իր աշխարհաքաղաքական շահերը նսեմացված են, այնքան, որ ինքը պարտավոր է ռազմական միջամտություն իրականացնել հարևան երկրում, ընդ որում՝ դա անել անգամ ողջ իրավաքաղաքական համակարգին դեմ գնալով:
Գերհզոր պետությունները, հիմնական խաղացողները, ըստ փորձագետի, շոկի մեջ են նման զարգացումներից. Ռուսաստանը նոր միջուկային պատերազմի նախադուռ է բացում: «Եթե մտածում են, թե դրա առաջը պետք է առնել, ստացվում է, որ իսկապես պետք է ռազմական ուժ կիրառվի: Մեծ Բրիտանիան ու ԱՄՆ-ը, որ երաշխիք էին վերցրել, պարտավոր են պատերազմական գործողությունների մեջ մտնել ու էդ երաշխիքներն ապահովել, այլապես աշխարհում առ ոչինչ կհամարվեն բոլոր իրավական միջազգային պայմանագրերը»,- ասաց նա:
Սարոյանի խոսքով՝ եվրոպական երկրները չեն հասկանում՝ ուր է տանում Պուտինը, ինչ վերաբերում է մեր երկրին, ապա Հայաստանը պարտավոր է չեզոքություն պահպանել:
