Հունիսի 9-ին Հայաստանի մի շարք մարզերի 23 համայնքում տեղական ինքնակառավարման մարմինների ընտրություններ են, որոնցից 14-ում համայքնի ղեկավարի և ավագանու հերթական ընտրություն է, իսկ 9-ում՝ արտահերթ։
Արտահերթ ընտրություններ են, մասնավորապես, Արարատի մարզի Սիս համայնքում, Արմավիրի մարզի 3 համայնքներում՝ Նորակերտ, Վարդանաշեն և Ապագա գյուղերում, որոնց ղեկավարները հեղափոխությունից հետո հրաժարական էին տվել և արտագաղթել։ Արտահերթ ընտրություն է նաև Լոռու մարզի Լեռնավան, Շենավան, Քարաձոր, Սյունքիի մարզի Գորայք և Տավուշի մարզի Ազատամուտ համայնքում։
Կենտրոնական ընտրական հանձնաժողովի կայքից պարզեցինք, որ այս պահին գրանցված թեկնածուներ չկան։ Թեկնածուների գրանցման ժամկետը մեկնարկելու է հաջորդ ամիս:
Ուշագրավ է, որ գրեթե բոլոր համայնքներում, որտեղ ընտրություններ են, նախկին համայնքապետերը չեն առաջադրվում, նրանք «հոգնած են և զզված»։ Մեզ հետ զրույցում էլ հեգնանքով ասում էին, թե տեղները զիջում են ջահելներին։
Առհասարակ, հեղափոխությունից հետո բազմաթիվ համայնքներում խնդիրներ առաջացան գործող համայնքապետերի և նոր իշխանության ներկայացուցիչների, ինչպես նաև համայնքի բնակիչների հետ։ Բնակիչները տարբեր համայնքներում դուրս են գալիս, փողոց փակում և պահանջում, որ համայնքի ղեկավարը հրաժարական տա։
Հեղափոխությունից հետո, ավելի կոնկրետ՝ մարտին 1-ին, հրաժարական է տվել գրեթե 27 տարի Սյունիքի մարզի Գորայք համայնքի ղեկավար Առուստամ Առուստամյանը։ Հունիսի 9-ին այստեղ արտահերթ ընտրություն է։ Խոշորացված համայնքի ղեկավար դառնալու հավակնություն ունեն 2-3 թեկնածու, որոնք ավագանու անդամ են և արդեն նախկին համայնքապետի խոսքով՝ իր հրաժարականի պատճառն են դարձել: «Ես հրաժարական տվեցի, քանի որ ավագանու մի երկու անդամ դիտավորյալ քայլեր էին անում, ավագանու նիստերի չէին գալիս, բյուջե չէր հաստատվում։ Ինչ մեթոդով իշխանության էին եկել, այնպես էլ շարունակում էին աշխատել։ Բյուջեն չէին հաստատում։ Ի վերջո պայմանավորվեցինք՝ իրենք բյուջեն հաստատեցին, ես էլ հրաժարական տվեցի։ Թող հիմա առաջադրվեն, տեսնեմ՝ ով է իրենց ընտրելու»,- ասաց նա։
– Իսկ Դուք ինչո՞ւ չեք փորձում նորից առաջադրվել, կամ ինչո՞ւ եք համոզված, որ առաջադրվողներին ժողովուրդը չի ընտրի։
– Այո, դրանց չի ընտրի։ Իսկ ես 61 տարեկան մարդ եմ, թող հիմա էլ ջահելները գան։
– Իսկ ավագանու անդամների հետ հակասությունը ինչի՞ց էր առաջացել։
– Իրենց անձնական հարցերը պետք է լուծեի, ես էլ չէի լուծում։ Դրա պատճառով սկսեցին ավագանու նիստերին չգալ, որ քվորում չապահովվի։ Մեկը փող էր ուզում, մեկը՝ օգնություն։ Ասում էին, որ իրենց հարցերը պետք է լուծեմ, մեկը տղայի համար գործ էր ուզւոմ, մյուսը՝ որ իր հարկերը մուծեմ։ Իսկ ես չէի անում, ու վեճեր, վիճաբանություն…
– Իսկ իրենք նո՞ր իշխանության թիմի ներկայացուցիչներ են։
– Նախկին փող բաժանողներն են ընտրությունների ժամանակ։
– ՀՀԿ-ի համա՞ր։
– Չէ, ինչի ՀՀԿ-ի, «Բարգավաճի» համար էին փող բաժանում։ Իսկ հիմա ներկայանում են որպես մաքուր, ազնիվ, արդար տղաներ։ Թող ներկայանան, տեսնենք՝ ինչ է լինելու։
– Հիմա ովքե՞ր են պատրաստվում առաջադրվել այս ընտրություններին։
– Ավագանու իմ նշած անդամներից մեկը՝ իմ նախկին տեղակալը, Սառնակունքի նախկին գյուղապետը, որ խոշորացման ժամանակ ինձ հետ թեկնածություն էր դրել։ Հիմա սրանք են երևում հորիզոնում, թե հետո ովքեր կառաջադրվեն՝ չգիտեմ։
– Պարոն Առուստամյան, Գորայքը խոշորացված համայնք է, Դուք էլ եղել եք խոշորացված համայնքի առաջին ղեկավարը. ճի՞շտ էր խոշորացման գործընթացը։
– Խոշորացմանը ես միանշանակ դեմ եմ եղել, բայց եթե հանրապետությունում մի նորմալ խոշորացված համայնք կար, ապա դա Գորայքն էր, որովհետև բնակավայրերը քիչ են, իրար մոտ, խնդիրները՝ նույն բնույթի. ասֆալտապատում, ջրագծեր, լուսավորության ցանցի անցկացում։ Այս բոլոր աշխատաքնները ես արել եմ համայնքի բյուջեով։ Նոր ծրագրեր էինք ներկայացրել, բայց կառավարությունը երկու ծրագիր՝ կոյուղագիծը և լուսավորությունը, հաստատեց, ապա, քանի որ շատ ուշ էր, տեղափոխեցիքն այս տարվա վրա, բայց այս տարի էլ բյուջեն չէր հաստատվում, իսկ հաստատվելուց հետո էլ իմ ու իրենց միջև անձնական խնդիրներ առաջացան, և այդպես էլ ծրագրերը մնացին։
– Անձանակն խնդիրները նաև մարզպետի՞՝ Հունան Պողոսյանի հետ էին։
– Ոչ, ես մարզպետի ու մարզպետարանի հետ ոչ մի խնդիր չեմ ունեցել։ Իրենք էլ չուզեցին միջամտել։ Փոխմարզպետը մեկ անգամ եկավ հանդիպման, որից հետո՝ էլ ոչ մի բան։ Ես էլ որ հասկացա՝ ոչ մեկին պետք չէ, հրաժարական տվեցի։
– Իսկ Դուք ՀՀԿ-ակա՞ն եք։
– 2016-ին իմ անունը գրել էին ՀՀԿ-ում, բայց նույնիսկ վկայական չեմ ստացել։ Ես դաշնակցական եմ։
– Այսինքն՝ ուզում եք ասել, որ ԲՀԿ-ի համար նախկինում կաշառք բաժանողները հիմա ցանկանում են դառնալ խոշորացված համայնքի ղեկավա՞ր։
– Այո։ Բայց ներկայանում են որպես նոր իշխանության գաղափարների կրող:
Լուսանկարը՝ Armeniasputnik-ի
