ԱՄՆ-ը Իրանի հետ կստորագրի համապարփակ համաձայնագիր միայն այն դեպքում, եթե երաշխիք ունենա, որ Թեհրանը չի ստանա միջուկային զենք: Այս մասին նշվում է ԱՄՆ պետքարտուղար Ջոն Քերիի՝ Ամերիկա-իսրայելական կոմիտեի հասարակական հարաբերությունների ամենամյա համաժողովի մասնակիցներին հղված ուղերձում՝ գրում է ITAR-TASS-ը:
«Ես խոսք եմ տալիս, որ ԱՄՆ-ը համաձայնագիր կստորագրի միայն այն դեպքում, եթե պատասխաններ տրվեն 3 ծայրագույն կարևոր հարցերի: Առաջինը՝ արդյոք այդ համաձայնագիրը երաշխավորո՞ւմ է, որ Իրանը չի կարողանա ստանալ միջուկային զենք: Երկրորդ՝ արդյոք Թեհրանը կարող է աշխարհին համոզել, որ իր միջուկային ծրագիրը խաղաղ նպատակներ է հետապնդում: Եվ երրորդ՝ արդյոք ԱՄՆ-ը բավականին ժամանակ կունենա՞ միջոցներ ձեռնարկելու համար, եթե Իրանը, այնուամենայնիվ, փորձի ատոմային ռումբ ստեղծել»,- ասել է Քերրին:
«Սրանք են մեր չափանիշները Իրանի հետ համապարփակ համաձայնագիր կնքելու համար»,- հավելել է նա:
