Այսօր Սահմանադրություն օրվան նվիրված միջոցառում էր կազմակերպել արդարադատության նախարարությանը կից գործող «Աջակցություն դատապարտյալին» հիմնադրամը։ Միջոցառումն իրենից ներկայացնում էր դատապարտյալների ձեռքի աշխատանքերի ցուցահանդես-վաճառք։ Այս տարի մասնակիցների թիվը, նախորդ տարվա համեմատ, մեծ էր՝ մասնակցում էր մոտ 40 դատապարտյալ՝ ներկայացնելով ավելի քան 200 աշխատանք։
Մեզ հետ զրույցում այս մասին տեղեկացրեց հիմնադրամի գործադիր տնօրեն Կառլեն Թորոսյանը։ Միջոցառմանը ներկա էին նաև արդարադատության նախարար Հրայր Թովմասյանը և այլ պաշտոնյաներ։ «Մենք այս միջոցառումը անցկացնում ենք մեր կանոնադրության համաձայն։ Տասը տարի առաջ հիմնադրամը ստեղծվել է դատապարտյալների զբաղվածության հարցը լուծելու, նրանց սոցիալական, մշակութային զարգացումն ապահովելու համար։ Ստեղծագործողներին պատվերները տալիս ենք մենք՝ հաշվի առնելով նրանց ձիրքը, անհրաժեշտ հումքը տրամադրում է հիմնադրամը»,- տեղեկացնում է Կառլեն Թորոսյանը։
Դատապարտյալների աշխատանքները հիմնականում նկարներն են, հուշանվերներ, մոմակալներ, գորգեր և այլն։ Այս անգամ փայտյա պատյան է պատրաստվել ոչ միայն Աստվածաշնչի ու Նարեկի, այլև Սահմանադրության համար։
