«Մենք հայ հասարակությանը չենք ճանաչում։ Մենք լավ չենք պատկերացնում նրա բոլոր շերտերը, նրա թաքնված ագրեսիայի պոտենցիալը, նրա իրական արժեքները: Չենք ճանաչում, որովհետև երբևէ խնդիր չենք դրել ճանաչելու»,- այս տեսակետի հեղինակը հրապարակախոս Վահե Հովհաննիսյանն է:
«Առաջին լրատվական»-ի հետ զրույցում նա կարծիք հայտնեց, որ մեր որևէ իշխանություն չի կարևորել քաղաքացու և հասարակության կրթումը, դաստիարակումը. «Մենք դեռևս ապրում ենք ուրիշների և հաճախ՝ ինքներս մեր մասին հորինած լեգենդների, պատկերացումների և հորինվածքների շրջանակներում, և չենք ուզում հասկանալ՝ ով ենք մենք, ինչ խնդիրներ ենք ուզում լուծել, ինչ ռեսուրսներով»:
Հրապարակախոսի դիտարկմամբ՝ ունենք արտագաղթի խնդիր, բայց չունենք այն լուծումները, որ պահպանենք և շատացնենք մեր բնակչության թիվը: «Ի վերջո պետք է հասկանանք՝ անկախ Հայաստանի ժողովուրդը ուզո՞ւմ է ապրել այստեղ, պատրա՞ստ է ավելի լավ պետություն ստեղծել, պայքարել դրա համար: Մենք տեսանք որ կարող է պայքարել իշխանություն փոխելու՝ ինչ-որ մեկին մերժելու կամ ինչ-որ մեկին երկրպագելու համար, բայց դա դեռ չի վկայում այն հիմնարար որոշումների մասին, որ հայ հասարակությունը կայացրել է պետություն պահելու և հզորացնելու վերաբերյալ: Քանի դեռ հասարակությունը չի կրթվել, օգտագործվելու է»,- նշեց Վ. Հովհաննիսյանը՝ հավելելով, որ հասարակությունն այսօր էլ օգտագործվում է և ենթարկվում մանիպուլյացիաների:
Հրապարակախոսի կարծիքով՝ իշխանությունից պետք է հանդարտեցնող ուղերձ գա, բայց բոլոր օղակներից ագրեսիա է գալիս:
Մանրամասն՝ տեսանյութում:
