«Առաջին լրատվական»-ի զրուցարկիցը Պահպանողական կուսակցության նախագահ Միքայել Հայրապետյանն է։
-Պարոն Հայրապետյան, Հայաստանի վարչապետ Նիկոլ Փաշինյանը հարցազրույց է տվել «Նեզավիսիմայա գազետա» ռուսաստանյան թերթին և հայտարարել, թե Ռուսաստանի հետ մեր հարաբերություններում ոչինչ չի փոխվել: Ըստ Ձեզ, ինչպե՞ս կարելի է գնահատել վարչապետի այս հայտարարությունը։ Արդյո՞ք սա չի նշանակում, որ ռուսական վասալության ռեժիմը պահպանվել է, իսկ թավշյա հեղափոխության արժեքները արտաքին քաղաքականության մեջ առհասարակ չեն կապիտալիզացվել։
– Ցավոք, Վարչապետը միանգամայն իրավացի է, դեռևս տեսանելիորեն չեն փոխվել ՌԴ-ի հետ մեր երկրի հարաբերությունները: Եթե համարում եք, որ նախկինում վասալային ռեժիմ է եղել, ապա նույնը կարող եք համարել նաև այսօր: Բայց դե միշտ է այդպես եղել. դեռևս դարեր առաջ էին հայկական զինված ուժերը հեգեմոնի կողմից մասնակցում համաշխարհային և տարածաշրջանային կռիվների՝ սկսած Տրոյական պատերազմում Զարմայր նահապետի խորենացիական հիշատակումից, մինչև Գավգամելայի ճակատամարտ կամ Հռոմի համար Ճորա պահակի հսկում, իսկ պարսիկների համար՝ կռիվ նրանց արևելյան թշնամիների դեմ: Իսկ թե որոնք են թավշյա հեղափոխության արժեքները, մի քիչ լավ չեմ պատկերացնում, թեև ցավով հիշում եմ, որ 2008-ին իմ հնչեցրած «Ազատ, Անկախ Հայաստան» հայրիկյանական կագախոսի Անկախ-ը 10 տարի անց փորձ արվեց դարձնել Արդար: Եթե ներքին քաղաքականության մեջ արժեքը եղել է Արդարությունը և այն կապիտալիզացվել է գեներալ Մանվելի «տուշոնկեքի» ազգայնացմամբ, ապա արտաքինում այդ արդարությունն այդքան ցցուն երևակել հնարավոր չէր, թեև Լուկաշենկոյին հակադարձվեց, իսկ Պուտինի առջև առաջին անգամ բարձրաձայնվեց մեր երկրի ինքնիշխան իրավունքներ ունենալու մասին:
-Մի շարք քաղաքագետներ նշում են, որ նախկին իշխանության ռուսամետ քաղաքականությունն այժմ փոխարինվել է գործող իշխանության պուտինամետությամբ։ Ո՞րն է դրա պատճառը, արդյո՞ք Հայաստանի նոր իշխանությունները վտանգ են զգում Ռուսաստանից։
– Քաղաքագետները հենց նման բաներ ասելու դիմաց են հոնորար ստանում: Իսկ որ Հայաստանի նոր իշխանությունները վտանգ են զգում Ռուսաստանից, դա հենց նոր իշխանության զգոնության մասին է խոսում: Ցանկացած սթափ հայ այդ վտանգը պարտավոր է զգալ. 200 տարվա պատմափորձը հակառակ բանի մեզ չի հանգեցրել:
-Խոսելով ԱՄՆ հետ հարաբերությունների մասին ՝ վարչապետն ասել է․ «Հայաստանի որևէ կառավարություն ԱՄՆ-ին չի քննադատել այնպես, ինչպես ես»: Արդյո՞ք տարակուսելի չեն Արևմուտքի նկատմամբ Փաշինյանի հայտարարությունները, և չե՞ն ազդի այդ հարաբերությունների վրա։
– Նախապես համաձայնելով Ձեզ հետ, որ ազդեցություն կլինի, Ձեր թույլտվությամբ այս հարցին պատասխանեմ խորհրդային շրջանի իմ ամենասիրելի անեկդոտներից մեկով: Այսպես. ամերիկացին ու սովետական քաղաքացին զրուցում են. ամերիկացին ասում է. «Մեր երկիրն ազատ է, ես կարող եմ կանգնել Սպիտակ տան առջև և ազատորեն հայհոյել պրեզիդենտ Ռեյգանին»: Սովետական քաղաքացին պատասխանում է. «Սովետական Միությունն էլ է ազատ երկիր, ես էլ կարող եմ կանգնել Կրեմլի առջև և ազատորեն հայհոյել պրեզիդենտ Ռեյգանին»:
