Հուլիսի 5-ի ՀՀ Սահմանադրության օրվա կապակցությամբ լրագրողական լսարանում հյուրնկալված սահմանադրագետ, Միջազգային համագործակցության ընկերության իրավական ծրագրերի ղեկավար Վարդան Պողոսյանը նշեց, որ մեծ տարբերություն կա Սահմանադրության տեքստի և սահմանադրական իրականության միջև, և այսօր առաջին հրամայականը սահմանադրականության հաստատումն է:
«Ամենամեծ խնդիրը Սահմանադրության կատարումն է, որը հետ է մնում բուն տեքստից»,- ասաց Պողոսյանը` հավելելով, որ Սահմանադրության պահանջների, հատկապես առաջին և երկրորդ հոդվածների իրականացումը մեր երկրում չի ստացվում, ինչը պայմանավորված է իշխանությունների վարքագծով և ժողովրդի իներտ մտածողությամբ: Սահմանադրությունը պահանջում է ազատ, արդար, ժողովրդավար, ինքնիշխան պետություն կերտելու համար նախ և առաջ նորմալ ընտրություններ անցկացնել: Մինչդեռ, բանախոսի դիտարկմամբ, անկախությունից հետո մեզ մոտ ընտրությունների անցկացման մեխանիզմը եղել է անկատար, եթե ոչ՝ հակասահմանադրական»:
Սակայն սահմանադրագետը կարծում է, որ Սահմանադրությունը փոխելու կարիք չկա, թեև կարելի է ավելի լավ տեքստ գրել, բայց այսօր պարզապես այն կատարել է պետք: Այսօր հրամայական է գործող Սահմանադրության կատարումը, և առաջին իրականացնողը գործադիրը պիտի լինի։ Ու եթե նրա նկատմամբ չկա վստահություն, ապա ինչ իմաստ ունի ավելի լավ տեքստ գրելը: