Հայաստանում հեղափոխությունից հետո արձանագրված ձեռքբերումների և տեղի ունեցած բացթողումների մասին զրուցելու համար «Առաջին լրատվական»-ը հյուրընկալել է քաղտեխնոլոգ Վիգեն Հակոբյանին և վերլուծաբան Աղասի Մարգարյանին:
Վիգեն Հակոբյանը նշեց, որ հեղափոխության գլխավոր կարգախոսը «Մերժիր Սերժին»-ն էր, և հանրության ճնշող մեծամասնությունը կարծես հանուն այդ կարգախոսի էր դուրս գալիս փողոց. «Եվ այդ կարգախոսը գրեթե 100 տոկոսով աշխատեց՝ այն առումով, որ նախորդ իշխանությունը հեռացվեց»:
Քաղտեխնոլոգի խոսքով, սակայն, այդ շրջանում չկային կառուցողական կարգախոսներ. «Ուստի ես չեմ կարծում, որ կառուցողակայն դաշտում կային լուրջ ակնկալիքներ. յուրաքանչյուր մասնակից իր պատկերացումն ուներ, թե հանուն ինչի է մասնակցում: Եվ մեկ տարի անց հավաքական սպասում գրեթե չկա, իսկ եթե կա, ապա այն ամորֆ է ձևակերպված՝ «ուզում ենք, որ լավ լինի»»:
Գնահատելով այսօրվա Ազգային ժողովի խճանկարը և որակը՝ Աղասի Մարգարյանը նկատեց. «Մենք գործ ունենք քաղաքական դաշտում նոր-նոր կայացող պատգամավորների հետ. ես անփորձությունը չեմ շեշտում, այլ այն նոր իրավիճակը, որի պայմաններում նրանք փորձում են դառնալ քաղաքական գործիչներ, քաղաքական գործոններ և դերակատարներ: Իհարկե, քաղաքական խոսքի որոշակի պակաս կա, բայց խորհրդարանում ունենք նաև պրոֆեսիոնալ քաղաքական գործիչներ՝ կլասիկ քաղաքական գործիչներ և տարբեր շերտերի ներկայացուցիչներ, ինչն էլ համուհոտ է տալիս»:
Վիգեն Հակոբյանն էլ կարծում է, որ այս խորհրդարանում կրթական ցենզը շատ ավելի բարձր է՝ նախորդի համեմատ. «Սակայն, ցավոք, որոշ քաղաքացիական ակտիվիստներ իրենց այդ կոստյումից չեն կարողանում դուրս գալ և դառնալ քաղաքական գործիչներ, իսկ որոշ քաղաքական գործիչներ այդպես էլ չեն վերածվում պետական գործիչների»:
Հարցազրույցն ամբողջությամբ՝ տեսանյութում:
