Տորֆի բռնկման պատճառով արդեն այսօր Ռուսաստանի մայրաքաղաքը կարող է կանգնել բնապահպանական լուրջ խնդրի առաջ: Ծուխը սպառնում է նախորդ տարիների պես ծածկել Մոսկվան: Այս մասին գրում է Коммерсант-ը՝ նշելով, որ երեկ արդեն մի քանի շրջաններում զգացվում էր այրված տորֆի հոտը:
Ականատեսները պատմում են, որ ծուխն արդեն պատել է Շատուրա, Գուս Խրուստալնի մերձմոսկովյան քաղաքները և Վլադիմիրի մարզը: Թեպետ արտակարգ իրավիճակների նախարարությունը հերքում է այս տեղեկությունները, սակայն, փորձագետների կարծիքով, նախարարությունը պարտվել է անտառային հրդեհների դեմ պայքարում՝ չնայած այս ձեռնարկի համար հատկացված մեծ գումարներին և այլ ռեսուրսներին:
Բնապահպաններն ասում են, որ այս ջանքերն ուշացած են ու ոչ բավարար, քանի որ տորֆի մեծ տարածություններն անհրաժեշտ էր ջրով ծածկել, սակայն հիմա այդ տարածքների մոտ գտնվող ջրային ավազանները չորացել են տաք եղանակի պատճառով, իսկ այլ տարածքներից ջուր բերելը շատ թանկ է:
