«Վարչապետը ճիշտ շեշտադրում է անում, որ արցախյան հարցի լուծողը հայ ժողովուրդն է։ Սա նոր մարտավարություն է։ Սա խոսում է այն մասին, որ Ղարաբաղը մի կողմից պետք է բանակցությունների մասնակից դառնա, մյուս կողմից սա տանում է ինքնորոշման հարթություն։ Սա նոր մոտեցում է»,- «Առաջին լրատվական»-ի հետ զրույցում ասաց պաշտպանության նախկին նախարար Վաղարշակ Հարությունյանը։
Նրա խոսքերով՝ Ադրբեջանը որդեգրել է ռազմատենչ քաղաքականություն, փորձում է ճնշման միջոցով ձևավորել վախի մթնոլորտ՝ հույս ունենալով, որ Հայաստանը չդիմանալով սպառազինությունների մրցավազքին, կգնա զիջումների, որը չի համապատասխանում իրականությանը։ «Այս իրավիճակում բանակցություններ մեզ պետք են, բայց այդ բանակցությունները պետք է սկսել նոր էջից։ Իրենց նպատակը մեկն է՝ ճնշում գործադրել հայկական կողմի վրա, շանտաժ անել համանախագահներին, որպեսզի իրենք բերեն մի տարբերակ, որը բխի իրենց շահերից, բայց, բնականաբար, դա չի լինի»,- ասաց Հարությունյանը։
Նա բանակցային մարտավարություն է համարում նաև հայկական կողմից հնչող խաղաղության նախապատրաստելու վերաբերյալ հայտարարությունները, բայց այդ հարթության մեջ ուշագրավ է պաշտպանության նախարարի հայտարարությունը, որ եթե նորից պատերազմ սկսի, նորից իրենք դիմեն հրադադարի, ապա հայկական կողմը չի համաձայնի դրան։ «Մի կողմից մենք սա ենք ասում, մյուս կողմից ասում ենք, որ մենք պատրաստ ենք բանակցել, կան համանախագահներ, մյուս կողմից էլ ասում ենք, որ մենք պատրաստ ենք պատերազմի և չենք վախենում իրենց սպառնալիքներից»,- նշեց Հարությունյանը։
Առավել մանրամասն՝ տեսանյութում։