Ռուսաստանն իր ինտեգրացիոն նախագծերում Ուկրաինայի համար բավական լուրջ և սոլիդ տեղ էր հատկացրել: «Առաջին լրատվական»-ի հետ զրույցում այս մասին ասաց Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն, տնտեսական և քաղաքական վերլուծաբան Կոնստանտին Սիմոնովն՝ անդրադառնալով հարցին, թե ինչ ապագա կունենան Ռուսաստանի նախաձեռնած ինտեգրացիոն ծրագրերն առանց Ուկրաինայի:
Նա նշեց, որ, բնականաբար, Ռուսաստանն իր նախաձեռնած ինտեգրացիոն նախագծերում բավական մեծ հույսեր էր կապել Ուկրաինայի հետ և չէր թաքցնում, որ Ուկրաինան հանդիսանում է այդ պրոյեկտի էական բաղադրիչը: Ըստ նրա՝ իրենք հասկանում էին, որ խորհրդային ժամանակաշրջանում գործարկված մոդելների վերականգնման գաղափարն ուկրաինական կոնտեքստով բավական էական է, որովհետև Ուկրաինան էական երկիր է եղել՝ բարձր արդյունաբերական ներուժ և բավական լուրջ ռեսուրսներ ունեցող, ուստի Ռուսաստանը չէր կարող հույսեր չկապել Ուկրաինայի հետ:
«Հիմա մենք հասկանում ենք, որ մեր ծրագրերը ստիպված ենք հետաձգել որոշակի ժամանակահատվածով, քանի որ հիմա Ուկրաինայում քաղաքական դասավորվածությունը կտրուկ փոխվել է, և այն, ինչ տեղի է ունենում Ուկրաինայում, ցույց է տալիս, որ հիմա սկսվում է կտրուկ քաղաքական ազդեցության մի փուլ. նոր նախագահը ստիպված կլինի հաշի առնել արևմտյան ռադիկալների կարծիքը, աջակողմյան սեկտորի կարծիքը, որը, փաստորեն, այսօր ղեկավարում է իշխանությունը, և այս իմաստով Ռուսաստանի հետ համագործակցությունը կդառնա քաղաքական տաբու Ուկրաինայում, բայց դա չի նշանակում, որ ինտեգրացիայի ծրագիրը հետաձգվելու է: Կանցնի նրանց իշխանավարման շրջանը, ինչպես Յուշչենկոյինն ավարտվեց, քանի որ նա ևս եկավ իշխանության նարնջագույն տրամադրությունների հոսքի հետ։ Ուկրաինային սպասվում է ծանր տնտեսական ճգնաժամ։ Ակնհայտ է, որ Եվրոպան հստակ ծրագիր չունի, և այստեղ պատրանքներ չպետք է ունենալ: Ռուսաստանը հիմա չպետք է քաշի Ուկրաինային դեպի իր ինտեգրացիոն նախագծերը, պետք է սպասի ճգնաժամի, իշխանության փոփոխության: Ես կարծում եմ, որ այս իշխանությունը նույնիսկ մեկ ընտրական շրջան չի կարողանա մնալ իշխանության։ Այս թեմային կարելի է անդրադառնալ միայն դրանից հետո, իսկ մինչ այդ Ուկրաինան լինելու է նարնջագույն փորձության մեջ։ Իրենց երևի անցյալը քիչ էր։ Ինչ անել այս իրավիճակում՝ պետք է միայն սպասել»,- ասաց նա: Ռուսաստանցի տնտեսագետը նշեց, որ ռուսական ինտեգրացիոն ծրագրերն առանց Ուկրաինայի ևս կայանում են:
«Հարցն այն է, որ Մաքսային միությունը և ինտեգրացիոն ողջ գործընթացը նախատեսված էր ավելի մասշտաբային ծավալի համար, առանց Ուկրաինայի այն ևս կայացել է, Ուկրաինայի հետ այդ տարածքն ավելի ընդարձակ ու հնարավորություններով լի կլիներ»,- այսպես ավարտեց իր խոսքը Կոնստանտին Սիմոնովը:
