Մոսկվան կարծում է, որ Բաքվի և Երևանի միջև Լեռնային Ղարաբաղի հակամարտության կարգավորման շուրջ վերջերս ձեռք բերված պայմանավորվածությունները չեն մնա թղթի վրա: Այդ մասին, ինչպես հաղորդել Է ՏԱՍՍ-ը, ապրիլի 17-ին հայտարարել է Ռուսաստանի արտաքին գործերի նախարար Սերգեյ Լավրովը՝ ելույթ ունենալով Սերբիայի իր պաշտոնակից Իվիցա Դաչիչի հետ բանակցությունների արդյունքներին նվիրված մամուլի ասուլիսում:
«Ադրբեջանի և Հայաստանի ԱԳ նախարարների՝ ապրիլի 15-ին Մոսկվայում կայացած հանդիպման արդյունքներով, զգալով այն մթնոլորտը, որում այժմ ընթանում է աշխատանքը, ես հիմքեր ունեմ ենթադրելու, որ թե՛ Բաքուն, թե՛ Երևանը շահագրգռված են, որ այս անգամ այդ պայմանավորվածությունները չմնան թղթի վրա,- ասել է Լավրովը:- Մենք կօգնենք դրան»:
