Այսօր՝ ապրիլի 17-ին, Ազգային ժողովում շարունակվում են աշխատանքները: Այժմ շարունակում է քննարկվել Կառավարության կառուցվածքի և գործունեության մասին օրենքում փոփոխություններ և լրացումներ կատարելու մասին հարցը:
«Լուսավոր Հայաստան» խմբակցության պատգամավոր Արման Բաբաջանյանը իր ելույթում հայտարարեց. «Այս քննարկումներին մեծ հետաքրքրությամբ հետևում են Սփյուռքում: Իսկ հասկանալու համար, թե ինչ է Սփյուռքը, խնդիր ունենք գույքագրելու Սփյուռքի համայնքների գիտական, կրթական, սոցիալական, տնտեսական և մշակութային կարողությունները: Սա նշանակում է արմատապես փոխել Սփյուռքի հետ հարաբերությունների պարադիգմը. ժամանակն է, որ Հայաստանը Սփյուռքի հետ սկսի հարաբերվել առաջարկողի կարգավիճակով: Մենք պետք է Սփյուռքին ներկայացնենք Հայաստանը իր ողջ հմայքով»:
Այս կոնտեքստում նա հարց բարձրացրեց, թե որքանով է նպատակահարմար սփյուռքի նախարարությունը փոխել հանձնակատարի գրասենյակով:
Պատգամավորի խոսքով՝ նախկին իշխանությունների համար Սփյուռքը եղել է նվիրատվությունների և բարեգործությունների աղբյուր. «Սփյուռքը շատ վիրավորված է այդ վերաբերմունքից, և նոր Հայաստանի իշխանությունների խնդիրը պետք է լիներ այդ վիրավորանքը վերացնելը, մինչդեռ սփյուռքի նախարարության վերացմամբ մեր հայրենակիցները հակառակ ազդակն են ստանում»:
Նա նշեց, որ սփյուռքահայերը պետք է ներդրումներ կատարեն ոչ թե հայրենասիրությունից, այլ տնտեսական արդյունավետությունից և շահից դրդված:
Արման Բաբաջանյանն ասաց, որ իրենց խմբակցությունն առաջարկել է կոմպրոմիսային տարբերակ՝ Սփյուռքի հարցերով հանձնակատարին տալ փոխվարչապետի կարգավիճակ. «Սփյուռքը պետք է վստահ լինի, որ իր ձայնը լսելի է հայրենիքում, և պետք է վստահ լինի, որ այսուհետ Հայաստանը պատրաստ է աջակցել Սփյուռքին: Միայն այս կերպ մենք կարող ենք շոշափելի արդյունքներ ապահովել ինչպես հայրենադարձության, այնպես էլ ներդրումների նպատակադրումներում»:
Մանրամասները՝ տեսանյութում:
