«Շփման գծում հրադադարի ռեժիմի խախտումները կշարունակվեն, բայց պատերազմի վերսկսումը Ղարաբաղում հնարավոր չէ»,- նման հայտարարությամբ այսօր հանդես եկավ Կովկաս ինստիտուտի տնօրեն, քաղաքագետ Ալեքսանդր Իսկանդարյանը՝ խոսելով պատերազմի վերսկսման հավանականության մասին:
Քաղաքագետի գնահատմամբ՝ շփման գծում հրադադարի խախտման և անհանգիստ վիճակի պահպանման պահանջը Ադրբեջանն ունի, իսկ ահա պատերազմի վերսկսման համար բոլորովին այլ պայմաններ, ռեսուրսներ, նպատակներ և ուժերի բոլորովին այլ հարաբերակցություն է հարկավոր: Իսկանդարյանը նկատեց, որ Ադրբեջանի իշխանություններին ինքը խելագար չի համարում, քանզի նրանք հստակ գիտեն, որ պատերազմ սկսելով՝ հսկայական վնաս կհասցնեն իրենց ռեժիմին. «Ինչո՞ւ պետք է Ալիևը Ադրբեջանի էլիտայի և տնտեսության համար նման ռիսկային որոշում կայացնի, որը ցանկացած զարգացման պարագայում Ադրբեջանի համար որևէ խնդիր չի լուծի»:
Քաղաքագետի խոսքերով՝ պատերազմը Ղարաբաղում կտևի ընդամենը 5 օր, իսկ այդ ընթացքում Ադրբեջանը հսկայական խնդիրներ կունենա՝ թե սոցիալ-տնտեսական, թե քաղաքական, թե հեռահաղորդակցության բնագավառում. «Դա ռեժիմի համար հսկայական ռիսկ է, իսկ արդյունքը՝ զրո»:
