Երևանի մասին նոր գիրքը՝ «Երևանյան հեքիաթներ» անվամբ, շուտով կլինի քաղաքի գրախանութներում։ Այն նախատեսված է 7-100 տարեկան երեխաների համար։ Սա Երևան քաղաքի մասին գրված առաջին հեքիաթաշարքն է, որն իրականության, հորինվածքի և երազանքի գեղեցիկ համադրում է։
Գրքում կա ութ հեքիաթ, որոնց հիմքում իրական պատմություններ են: «Սիրո քաղաքի հեքիաթը՝ Երևան» հեքիաթում տեսնելու ենք Արգիշտի արքային, որը հիմնադրում է Էրեբունի քաղաքը և սիրահարված է Տաթև անունով աղջկա։
«Կարմիր բլուրը» պատմություն է փոքրիկ տղայի մանկության մասին, որը քնում է կարմիր կակաչներով բլրի վրա, հետագայում մեծանալով դառնալու է հնագետ և պեղումներ կատարելով՝ պատմելու է աշխարհին Կարմիր բլուրում անթեղված քաղաքակրթության մասին։
«Սասունցի Դավիթ» հեքիաթում ծանոթանում ենք Երևանի ամենահին բնակչին՝ թզուկ Ռուդոլֆին, որն այնքան տարեց է, որ դարեր առաջ ճանաչել է նույնիսկ մեր էպոսի հերոսին՝ Սասունցի Դավթին և ընկերություն արել Դավթի քանդակը կերտած Երվանդ Քոչարի հետ։
Երևակայությունն և պատմությունը միահյուսված են իրար, ինչ ավելի ցայտուն է դառնում գրքի գունեղ պատկերազարդումների շնորհիվ։
Գրքի խմբագիրն է Լեզվի տեսչության նախկին պետ, «Երգ երգոց» հաղորդաշարի սցենարի բազմամյա հեղինակ Լևոն Գալստյանը: Գրքի հեղինակը շատ է կարևորում այս համագործակցությունը և շեշտում, որ Գալստյանի շնորհիվ հեքիաթները պարզ, սիրուն և գրագետ լեզու ունեն։
«Խմբագրի, նկարչի հետ մեր աշխատանքի հիմքում մեծ սերն է եղել և հավատը արվող գործի նկատմամբ։ Հուսով ենք՝ այս գիրքը օրվա կյանք չի ունենա և կապրի շա՛տ երկար։ Իհարկե, ժամանակը ցույց կտա, և ընթերցողը կորոշի գրքի ճակատագիրը, բայց իմ նպատակը փոքրիկ գանձ թողնելն է սերունդներին»,- ասում է հեղինակը։
Լևոն Գալստյանը կարծում է, որ լավ գործ է արված. «Ճիշտ կլիներ, որ գիրքը ներառվեր դպրոցական օժանդակ ընթերցանության ցանկում»։
Հեղինակը մինչ տպագրությունը հեքիաթները տվել է տարբեր մարդկանց ընթերցելու՝ կարծիքներ ժողովելու համար։ 10-ամյա Լևոնը ծնողներին ստիպել է տանել իրեն Մատենադարան, մի վայր, որտեղ ծավալվում են կախարդական հեքիաթներից մեկի իրադարձությունները։
Ուսուցչուհի Անահիտ Թադևոսյանն ասում է. «Երբ կարդացի Արփիի գրած հեքիաթները, հուզված և ցնցված հասկացա՝ հենց այս բառերն են պետք՝ պատմելու համար Երևանի գեղեցկության, բարության, բազում գանձերի, երևելի մարդկանց մասին, որոնք Երևանը այսպիսին են դարձրել»:
Ուսուցչուհի Արմինե Կոծինյանն ասում է.«Երանի այս նուրբ ու պարզ հրաշքն արդեն այսօր հայտնվի հայ աշակերտի սեղանին»։
Արփի Մաղաքյանից տեղեկացանք, որ Երևանի նախկին փոխքաղաքապետի հետ պայմանավորվածություն է եղել, որ հեքիաթներից մի քանիսը պետք է մուլտֆիլմ դառնային երեխաների համար, սակայն քաղաքապետարանի նոր աշխատակազմը դեռևս անտարբերություն է ցուցաբերում մայրաքաղաքի մասին տպագրվող գրքի նկատմամբ։
Փոխարենը անտարբեր չեն աշխարհասփյուռ հայերը, որոնք ֆեյսբուք սոցիալական ցանցում գրքի տպագրման համար կազմակերպված դրամահավաքին հանգանակել են արդեն 4 հազար դոլլար։
Հեղինակն ասում է, որ տպագրական գործընթացին ծանոթ մարդիկ գիտեն, որ հաստ կազմով և գունավոր նկարազարդմամբ գիրքը բավական թանկ հաճույք է, և հավաքված գումարը չի բավականացնելու ծախսերը հոգալու համար, սակայն նշում է. «Շատ հուզված եմ նման աջակցությունից, երկու օրվա մեջ արդեն հանգանակվել էր 2000 դոլարից ավել գումար։ Սա հրաշալի է և շատ պարտավորեցնող։ Առաջին անգամ հայն իր մայրաքաղաքի համար հանգանակությամբ գիրք է տպում։ Պատկերացնու՞մ եք՝ սա ինչ է նշանակում։ Սա մեր սիրո խոստովանությունն է մեր մայրաքաղաքին»։
Գրքի շնորհանդեսը կկայանա Հունիսի 1-ին՝ Երեխաների իրավունքների պաշտպանության միջազգային օրը, Արամ Խաչատրյան համերգասրահում՝ Հայաստանի ազգային ֆիլհարմոնիկ նվագախմբի հետ համատեղ հետաքրքիր երաժշտական բեմականացմամբ։