Սեյշելյան կղզիների նախագահ Դեննի Ֆորան օվկիանոսի խորքից աշխարհին կոչ է արել ուժեղացնել «մեր մոլորակի զարկող կապույտ սրտի» պաշտպանությունը:Դեննի Ֆորան սուզվել էր օվկիանոսի խորքը սուզանավով, հաղորդում է AP-ը:
Նա ելույթ է ունեցել Հնդկական օվկիանոսի խորքն ուսումնասիրող Մեծ Բրիտանիայի ղեկավարությամբ գիտական արշավախմբի հետ հանդիպման ժամանակ:
Օվկիանոսները ծածկում են Երկրի մակերեսի ավելի քան երկու երրորդը, սակայն մեծամասամբ չեն հետազոտվում: Ֆորայի խոսքերով՝ մենք ունենք Մարսի քարտեզը, որը շատ ավելի ճշգրիտ է, քան օվկիանոսի հատակի քարզետները:
«Այդ խնդիրն ավելի կարևոր է, մենք չենք կարող սպասել, որ հաջորդ սերունդը լուծի այն: Որևէ գործողություն չձեռնարկելու մեր արդարացումները սպառվում են, և ժամանակ չի մնում»,-ասել է նախագահը 121մ խորության վրա սուզանավի մեջ գտնվելով:
Սուզվելուց հետո նա նշել է, որ դա «աննախադեպ փորձ էր»: Նրա խոսքերով՝ դրա արդյունքում նա ավելի վճռական է դարձել ծովերի պաշտպանության համար պայքարում:
