Այսօր ԵԱՀԿ երևանյան գրասենյակի ղեկավարի տեղակալ Կարել Հոֆստրան հարցազրույց է տվել Novosti-Armenia գործակալությանը:
Հոֆստրան նախ անդրադարձել է ՀՀ ոստիկանության հետ փոխգործակցության հիմնախնդիրներին՝ նշելով, որ այդ գործակցությանը սկսում է 2005 թվից: Նա ասել է, որ փոփոխությունները, որոնք պետք է կատարվեն ոստիկանությունում, ավելի շատ պետք է լինեն ոչ թե կառուցվածքային, այլ բնակչության հետ շփվելու ոստիկանության փիլիսոփայության հետ: Նա շեշտել է, որ արևմտյան երկրներն այդ ճանապարհն անցել են 1960-70-ականներին, ինչն օգնել է շատ խնդիրների լուծմանը: Հոֆստրան ասել է նաև, որ այդ ամենը պետք է արվի՝ հաշվի առնելով նաև հայկական մշակութային և ազգային առանձնահատկությունները՝ հավելելով, որ փոփոխություններ են նախատեսվում նաև ոստիկանական կրթական ծրագրերում:
Հոֆստրան անդրադարձել է 2008 թ. Մարտի 1-ի դեպքերին և այդ համատեքստում հասարակություն-ոստիկանություն հարաբերություններին՝ նշելով, որ մարտյան դեպքերը լրջագույն մարտահրավեր են եղել ոստիկանության համար. «Մարդկանց ցանկացած խումբ պետք է իրավունք ունենա իր կարծիքը հայտնել ցույցերի և հանրահավաքների միջոցով, իսկ պետությունը պարտավոր է ապահովել այդ իրավունքի իրագործումը: Մենք ակնկալում ենք, որ մոտ ժամանակներս Մեծ Բրիտանիայից փորձագետ կժամանի Հայաստան՝ այդպիսի մարտահրավերների հաղթահարման հայեցակարգ ոստիկանության ղեկավարության հետ համատեղ մշակելու համար»,- ասել է նա:
Հոֆստրան խոսել է նաև ՀՀ իշխանությունների կողմից իրականացվող հակակոռուպցիոն պայքարի ծրագրերից՝ ասելով, որ թեև Հայաստանի իշխանությունները որոշակի գործողություններ անում են այդ ուղղությամբ, սակայն ԵԱՀԿ-ն ավելին է սպասում: «Անհրաժեշտ են ավելի վճռական քայլեր, առաջին հերթին՝ իշխանությունների կողմից: Հասարակությունն, իհարկե, պետք է անհանդուրժողականություն դրսևորի կոռուպցիոն երևույթների նկատմամբ, իր ներդրումն ունենա այդ չարիքի դեմ պայքարում, սակայն փորձը ցույց է տալիս, որ շարքային քաղաքացիները քիչ բան կարող են փոխել»,- ասել է ԵԱՀԿ պաշտոնյան: «Մեր համոզմամբ, կաշառակերության դեմ պայքարում կարևոր դերը պետք է լինի կառավարությանը: Իհարկե, կա մենթալիտետի խնդիր, սակայն եթե քաղաքացին կարող է իր որոշակի խնդիրներ լուծել միայն կաշառք տալով, կաշառակերությունը երբեք չի վերանա: Պայքարը պետք է տարվի կոռումպացված չինովնիկի դեմ, այդ թվում՝ երկրի բարձրագույն էշելոններում»,- հավելել է Հոֆստրան:
Որպես ժողովրդավարական բարեփոխումների տեսակետից խնդրահարույց ոլորտներ՝ Հոֆստրան Հայաստանում առանձնացրել է զինված ուժերը: «Իհարկե, իրավիճակը հեռու է կատարյալից, սակայն մենք տեսնում են որոշակի քայլեր, քաղաքական կամք: Շնորհիվ դրա՝ շատ բացասական երևույթներ հնարավոր է դարձել նվազեցնել»,- ասել է Հոֆստրան:
Ինչ վերաբերում է խոսքի ազատությանը, ապա Հոֆստրան տարակուսանք է հայտնել՝ ասելով, որ ամբողջ աշխարհում ալիքների թվայնացումը հանգեցնում է դրանց ավելացմանը և բազմակարծության տարածմանը, սակայն Հայաստանում հակառակ գործընթացն է: «Դա զարմացնում է: Հավանաբար դա կապված է թվայնացման գործընթացին անցնելու թափանցիկության պակասի հետ: Հիմա մենք Մարդու իրավունքների հանձնաժողովի հետ աշխատում ենք այդ հարցի ուղղությամբ»,- հավելել է ԵԱՀԿ փոխդեսպանը:
Որպես առաջիկա մեկ տարվա ԵԱՀԿ երևանյան գրասենյակի ծրագրի բաղկացուցիչ կետեր՝ նա նշել է ավելի քան 26 հազար օրենքների և ենթաօրենսդրական ակտերի թվի կրճատումը, որն իրականացվում է կառավարության հետ համատեղ, քանի որ դրանց մի որոշակի մաս չի գործում և կորցրել է իր արդիականությունը: «Օրենքների թվի կրճատումն ավելի հասկանալի կդարձնի Հայաստանը և, հետևաբար, ավելի հրապուրիչ՝ ներդրողների համար: Սա շատ կարևոր նախագիծ է, որը, կարծում ենք, կսկվի այս տարվա աշնանը և կտևի երկու տարի»:
