«Հայաստանում համակարգային կոռուպցիայի գլուխը կտրված է, բայց երաշխիք չկա, որ այդ գլուխը չի աճելու»,- «Առաջին լրատվական»-ի հետ զրույցում ասաց «Թրանսփարենսի ինթերնեշնլ» հակակոռուպցիոն կենտրոնի գործադիր տնօրեն Վարուժան Հոկտանյանը՝ անդրադառնալով ԵԽԽՎ լիագումար նիստի ընթացքում վարչապետ Նիկոլ Փաշինյանի հնչեցրած գնահատականներին։
Իսկ վարչապետը, հիշեցնենք, ԵԽԽՎ ամբիոնից հայտարարել էր, որ Հայաստանում փակված է համակարգային կոռուպցիայի էջը։ «Հայաստանում հսկայական քաղաքական փոփոխություններ են տեղի ունենում. հաջողվել է Հայաստանից արմատախիլ անել համակարգային կոռուպցիան, վերացնել մենաշնորհային տնտեսակարգը, օրենքի առաջ բոլոր մարդկանց հավասարության իրական պայմաններ ստեղծել: Ընտրությունների կեղծման, համակարգային կոռուպցիայի էջը Հայաստանում փակված է անշրջելիորեն, կառավարությունը միջոցներ է ձեռնարկում մարդու իրավունքների պաշտպանության մակարդակը շարունակաբար բարձրացնելու ուղղությամբ»,- ընդգծել էր վարչապետը։
«Ճիշտ է, վարչապետի հայտարարությունը քաղաքական է, ԵԽԽՎ ամբիոնից նա այլ բան չէր էլ կարող հնչեցնել։ Բայց մենք տեսանք, որ այդ հայտարարությանը զուգահեռ նա Եվրախորհրդից ակնկալում էր նաև օգնություն, որը նշանակում է, որ վարչապետը շատ լավ գիտակցում է, որ ինստիտուցիոնալ համակարգ պետք է լինի, որպեսզի համակարգային կոռուպցիան չվերադառնա»,- ասաց Հոկտանյանը՝ հավելելով, որ ասել, թե համակարգային կոռուպցիան անշրջելիէ վերացել, մի քիչ սխալ կլինի:
«Այո, այսօր գուցե համակարգային կոռուպցիա չկա, բայց համակարգային կոռուպցիա ծնող պատճառները, գործոնները դեռևս վերացված չեն, հաղթահարված չեն։ Ներկայումս իրավիճակը բարելավվել է՝ ելնելով հեղափոխական խանդավառությունից, ոգևորությունից։ Նաև լրատվամիջոցների հրապարակումներից դատելով էլ, այո, կարելի է պնդել, որ համակարգային կոռուպցիա չկա։ Կոռուպցիոն բուրգի վերևի շղթան իսկապես չկա, բայց միջին և ստորին օղակներում դեռ հարց է։ Հարկավոր է լուրջ հետազոտություն, որպեսզի պարզվի՝ համակարգային կոռուպցիա կա՞, թե՞ ոչ»,- նկատեց Հոկտանյանը՝ հավելելով, որ ինքը ստեղծված իրավիճակը կբնորոշեր այսպես՝ կոռուպցիա երևույթի գլուխը կտրված է, բայց չկա դեռ նախադրյալ, որ այդ գլուխը չի աճի. «Դեռ կան գործոններ, և դա լավ հասկանալով՝ վարչապետն ակնկալում է օգնություն ինստիտուցիոնալ համակարգ ստեղծելու համար, քանի որ եթե համակարգային կոռուպցիան անշրջելի վերացած լիներ, ապա կարելի էր բավարարվել եղած արդյունքներով և եղած հակակոռուպցիոն կառույցներով։ Իսկ եթե խոսք է գնում լուրջ հակակոռուպցիոն ինստիտուցիոնալ մարմին ունենալու մասին, որը հիմա չունենք և տարիներով չենք ունեցել, դա նշանակում է, որ վարչապետը վտանգ է տեսնում, որ այդ երևույթը կարող է վերադառնալ»։
Անդրադառնալով հակակոռուպցիոն ինստիտուցիոնալ մարմին ստեղծելուն և այդ հարցում իշխանության կողմից դեռևս չկողմնորոշվելուն՝ Հոկտանյանը նշեց, որ իշխանությունը կարծես թե մտորումների մեջ է, թե ինչ տիպի մարմին ստեղծել։
Նշենք, որ Նիկոլ Փաշինյանը հեղափոխությունից հետո հայտարարում էր հակակոռուպցիոն անկախ ունիվերսալ մարմին ստեղծելու մասին, բայց հետո այդ մարմինը ստեղծելու հարցում հստակ դիրքորոշում չարտահայտվեց։ Ավելին, Փաշինյանը նշեց, որ ինքը չի ցանկանում, որ պետության մեջ պետություն ստեղծվի։ «Համենայնդեպս, կառավարության ծրագրում ոչ մի խոսք չկար հակակոռուպցիոն ունիվերսալ մարմին ստեղծելու մասին. կա՛մ իրենք լավ չեն պատկերացնում կառույցը, կա՛մ որոշակի այլ խնդիրներ են տեսնում»,- ասաց Վարուժան Հոկտանյանը։
