Թուրքիայի նախագահ Աբդուլլահ Գյուլը հավանություն է տվել իրավական գործունեության կարգավորման մասին օրինագծին, համաձայն որի՝ երկրի դատաիրավական համակարգի գլխավոր ինստիտուտի հիմնական լիազորություններն անցնում են արդարադատության նախարարությանը: Այս մասին ասվում է պետության ղեկավարի կայքում՝ փոխանցում է RIA Novosti-ն:
Թուրքիայի կառավարությունը խորհրդարան էր ներկայացրել օրենսդրական նախաձեռնություններ, համաձայն որոնց՝ Թուրքիայի դատավորների ու դատախազների գերագույն խորհրդի կառուցվածքում մտցվում են էական փոփոխություններ, մասնավորապես, նրա հիմնական լիազորություններն անցնում են արդարադատության նախարարությանը:
Նախագահը հայտարարել է, որ օրինագիծը համարում է հրապարակման պատրաստ: «Կարծում եմ՝ ավելի ճիշտ որոշում կլինի դրա վիճելի կետերը, բացի արդեն ուղղվածներից, Սահմանադրական դատարանի դիտարկմանը փոխանցելը»,- ասել է նախագահը:
Համաձայն թուրքական օրենսդրության՝ նախագահի կողմից հավանության արժանացած օրինագիծը հրապարակվում է կառավարական Resmi Gazete թերթում և ավտոմատ կերպով ուժի մեջ մնում:
Օրենքը Թուրքիայի ընդդիմադիր կուսակցությունների ու հասարակական կազմակերպությունների բացասական արձագանքն է առաջացրել: CNN Turk-ի տվյալներով՝ ընդդիմադիր Ժողովրդա-հանրապետական կուսակցության ներկայացուցիչներն արդեն պատրաստում են Սահմանադրական դատարան դիմել:
