ԵՄ-ն բանակցում է ՀՀ կառավարության հետ: Այս մասին այսօր մի քանի լրատվամիջոցների հետ ճեպազրույցի ընթացքում ասաց ՀՀ-ում ԵՄ պատվիրակության ղեկավար Տրայան Հրիսթեան՝ պատասխանելով «Առաջին լրատվական»-ի հարցին՝ ի՞նչ տեսք է ունենալու ՀՀ-ԵՄ գործողությունների ծրագրի փաստաթուղթը:
Նա նշեց, որ Հայաստանն ու ԵՄ-ն երկկողմ համաձայնագիր ունեն, որը կոչվում է Գործընկերության և երկկողմ հարաբերությունների համաձայնագիր, և այդ համաձայնագրի մի փաստաթուղթ ստորագրվել է Վիլնյուսում՝ գործողությունների ծրագիրը, որն այդ համաձայնագրի մասն է կազմում:
Ըստ նրա՝ այդ գործողությունների պլանն արդիականացված ծրագիր է: «Ներկայումս մենք բանակցում ենք ՀՀ կառավարության հետ՝ տեսնելու, թե ինչպես կարելի է այն արդիականացնել, և դա շարունակական գործընթաց է»,- նկատեց նա:
Հարցին՝ Հայաստանը այլևս չի՞ մասնակցելու «GSP + առևտրային ռեժիմին», նա պատասխանեց, որ Հայաստանը վերջերս է դարձել այդ առևտրային գործիքի շահառու, և բոլոր երկրները, որոնք շահառու են այդ համակարգին, տարբեր ոլորտի և համագործակցության ուղիներ են փնտրում ու իրականացնում այս ձևաչափով:
«Նրանց ընտրած տարբերակը որևէ առնչություն չունի ամբողջ «GSP+»-ի փիլիսոփայության հետ: Ինչ վերաբերում է ամբողջ փիլիսոփայությանը, ապա երկրները, որոնք ցանկանում են վավերացնել 27-29 միջազգային կոնվենցիա, պետք է մասնակցեն այդ գործիքին: Ինչպես ցանկացած մեխանիզմ, դա ունենալու է իր մեկնարկը, և ընթացքը ենթարկվելու է մոնիտորինգի»,- նշեց նա:
