Իշխանություն-ԲՀԿ փոխհրաձգությունը շարունակվում է: Այժմ էլ ԲՀԿ նախագահ Գագիկ Ծառուկյանն է հայտարարել, որ եթե տրանսգենդերի ելույթը քաղաքական սադրանք էր, ապա ոչ թե «Իմ քայլի», կառավարության, այլ ԲՀԿ-ի դեմ: Ընդ որում, նա այդպես պատասխանելով նախօրեին Նիկոլ Փաշինյանի արած հայտարարությանը՝ նաև ասել է, թե վարչապետը կարող է հանձնարարել, և լծակներ կան արագորեն պարզելու, թե ով է արել սադրանքը: Կհանձնարարի՞ դա Նիկոլ Փաշինյանը, ինչպես, օրինակ, հանձնարարություն եղավ սոցցանցային ֆեյքերի առումով: Սակայն այս քաղաքական փոխհրաձգությունից վեր՝ իրավիճակը կարծես թե գտնվում է, այսպես ասած, կրկեսի և լուրջ խնդրի արանքում:
Իսկապես, եթե կա սադրանք, ապա ակնառու է, որ այն ստացել է բավականին լուրջ մասշտաբներ՝ հաշվի առնելով այն, որ խնդիրը ոչ միայն ներքաղաքական թեժ զարգացումների առիթ է տվել, այլ նաև ներգրավել է արտաքին լուրջ դերակատար՝ Եվրամիությունը: Ավելին, եղել է ԵՄ դիվանագետների հայտարարությանը Հայաստանի ԱԳՆ պատասխանը, ընդ որում՝ բավականին լուրջ, որը նաև հորդոր էր Եվրամիությանը հարգել Հայաստանի հանրության տրամադրությունները: Ընդ որում, պետք է նկատել, որ առկա իրավիճակում Հայաստանի ԱԳՆ հայտարարությունը թվում է կոշտ, սակայն համարժեք էր, որովհետև իրավիճակը կարծես թե բավական անհամարժեք էին գնահատել ԵՄ դեսպանները՝ Հայաստանի մի քանի մարգինալ խմբերի ագրեսիվ բողոքի դրսևորումներին տալով փաստորեն ընդհուպ աշխարհաքաղաքական աստառ: Իսկ երբ ԵՄ դիվանագետները հայտարարություն են անում, այդ աստառը ինքնաբերաբար առկա է, և դրանից խուսափել չի ստացվի, համենայնդեպս Հայաստանի վրա բիծ գտնելու հարցում շահագրգռվածները, ինչպես նաև Հայաստան-Եվրամիություն հարաբերության անիվների արանքը փայտ խրելու հարցում շահագրգռվածները բավական շատ են բաց թողնվող առիթներ թույլ չտալու համար:
Ըստ այդմ՝ Հայաստանի արտգործնախարարության արձագանքը բավականին տեղին էր, որպեսզի ի վերջո եվրոպացի դիվանագետները քաղաքական առումով շատ ավելի համարժեք գնահատեն Հայաստանում հետհեղափոխական իրավիճակը: Սա կբերի՞ Հայաստան-ԵՄ հարաբերության լարման, որը կարծես թե բավականին լավ մակարդակի էր հասել Նիկոլ Փաշինյանի՝ շաբաթներ առաջ Բրյուսել կատարած այցի շնորհիվ: Բայց հենց այդ հարցն է, որ նախ՝ պետք է իրենց տային ԵՄ դեսպանները հայտարարությունն անելիս: Տվե՞լ են: Ահա այս առումով մի կողմից՝ կան հիմքեր ենթադրելու, որ տեղի է ունեցել Հայաստանի դեմ իսկապես մասշտաբային հեռանկար պարունակող մի սադրանք՝ ընդհուպ արտաքին ներգործության հնարավոր դրսևորումներով, իսկ մյուս կողմից՝ եթե սադրանք չկա, այլ կա իրադարձությունների այդօրինակ զարգացում, ապա կրկեսի կարող է վերածվել քննությունը, թե ով է իքս քաղաքացուն տվել խորհրդարանի լսումներին ելույթ ունենալու հնարավորություն:
Ըստ երևույթին անհրաժեշտ է «ոսկե միջինը»՝ պարզել, սակայն «ներքին կարգով», իսկ առերևույթ լրջորեն մտածել Հայաստանի տեղեկատվական անվտանգության մակարդակի մասին, մտածել լրջորեն, որովհետև ունենք մի դրսևորում, որը առնվազն թողել է պետության վրա նախնական հետևանք-ազդեցություն: