Արցախյան հիմնախնդրի կարգավորման բանակցային գործընթացի, վերջին շրջանում կողմերից հնչող հայտարարությունների շուրջ «Առաջին լրատվական»-ի հետ քննարկմանը մասնակցեցին «ՌԵգիոն» հետազոտական կենտրոնի տնօրեն Լաուրա Բաղդասարյանը և «Իմ քայլը» խմբակցության պատգամավոր Միքայել Զոլյանը:
Անդրադառնալով ՀՀ պաշտպանության նախարար Դավիթ Տոնոյանի հայտարարությանն այն մասին, որ սադրանքի դեպքում հակառակորդի հետ առերեսվելու ենք իրենց տարածքում, Մ. Զոմլյանը նշեց. «Կարծում եմ՝ այս հայտարարությունը պետք է դիտարկենք ընդհանուր առմամբ հայկական կողմի նոր մոտեցման շրջանակներում: Մի կողմից՝ մենք ասում ենք, որ խաղաղության կողմնակից ենք, և դա անկեղծ ենք ասում ու շահագրգռված ենք, որ խաղաղություն լինի, մյուս կողմից՝ ասում ենք, որ մեզ հետ չի կարելի խոսել սպառնալիքների լեզվով: Ադրբեջանի կողմից նախկինում կար այսպիսի մարտավարություն՝ որպես մեծ զիջում, ներկայացվում էր այն հանգամանքը, որ Ադրբեջանը պատերազմ չի սկսում: Դ. Տոնոյանի հայտարարությունը միտված է նաև այդ տրամաբանությանը հակադարձելուն՝ ըստ էության հասկացնելով, որ եթե դուք պատերազմ սկսեք, ծանր հետևանքներ կունենաք, և պատերազմ չսկսելը չպետք է ներկայացնել որպես զիջում: Սա առաջին անգամ չէր, Դ. Տոնոյանը մի քանի անգամ շատ հստակ այդպիսի մեսիջներն ուղղել Ադրեջանին: Սա ռազմատենչ, պատերազմի հանգեցնող կոշտ հայտարարություն չէ, ընդհակառակը՝ նման հայտարարություններն ուղղված են խաղաղությունը պահելուն: Բոլոր կողմերը պետք է գիտակցեն ագրեսիվ գործողությունների հետևանքները, եթե Ադրբեջանը հստակ գիտակցի դա, ապա հավանականությունը, որ կդիմի այդպիսի գործողությունների, ավելի փոքր կլինի»:
«Պատերազմի մասին միշտ Ադրբեջանն է խոսել, 2016թ. ապրիլյան պատերազմից հետո հայ հասարակության վերաբերմունքը փոխվեց, և պատերազմի մասին խոսելու մենաշնորհն այլևս Ադրբեջանինը չէ հանրային մակարդակում,- նշեց Լ. Բաղդասարյանը: – Եվ հիմա բանակցությունների գնացող առաջին դեմքերի, մասնավորապես պաշտպանության նախարարի շուրթերով ասվում է, որ պատերազմի թեման չպետք է օգտագործել որպես սպառնալիքի գործիք՝ հայկական կողմին ստիպելու ընդունել Ադրբեջանի կողմից առաջադրված պայմանները: Պատերազմի թեման օգտագործվում էր որպես մանրադրամ՝ եթե մենք չենք գնում պատերազմի, ապա դուք պետք է բանակցությունների միջոցով գնաք զիջումների: Պաշտպանության նախարարի հայտարարությունն այն մասին, որ պատերազմի դեպքում ոչ միայն հայկական կողմից չեն լինելու տարածքային զիջումներ, այլ հակառակը՝ հնարավոր է Ադրբեջանն ունենա նոր կորուստներ, կարծես թե կասեցնում է Ադրբեջանի պատերազմելու ախորժակը»:
Քննարկման մասնակիցներն անդրադարձան նաև վարչապետ Ն. Փաշինյանի հայտարարությանն այն մասին, որ պատերազմի սպառնալիքին պատասխանելու ենք խաղաղության օրակարգով, անհրաժեշտության դեպքում խաղաղություն պարտադրելու օրակարգով, և ընդգծեցին, որ պաշտպանության նախարարի և վարչապետի հայտարարություններում հակասություններ չկան: «Շատ կարևոր է, որ այս երկու մեսիջները զուգահեռ են գնում, որովհետև միայն խաղաղության պատրաստ լինելու մասին խոսելը թյուր պատկերացում է ստեղծում, և սա կարող է ընկալվել որպես թուլության դրսևորում, ինչն էլ կարող է հանգեցնել էսկալացիայի»,- նշեց Մ. Զոլյանը:
Մանրամասն՝ տեսանյութում: