Ռուսաստանի Դաշնության նախագահ Վլադիմիր Պուտինն ամփոփել է Թուրքիայի առաջնորդ Ռեջեփ Թայիփ Էրդողանի հետ բանակցությունները, որոնք տեղի են ունեցել ապրիլի 8-ին, Մոսկվայում, գրում է Regnum-ը։
Պուտինի խոսքով՝ բանակցությունները բարենպաստ չէին և ռուս-թուրքական հարաբերություններում դեռ կան մի շարք չլուծված հարցեր։
«Եթե կարծում եք, որ մեր բոլոր բանակցություններն այնքան բարենպաստ են եղել, որ մենք միայն գովաբանել ենք միմյանց և ձեռքբերումներից խոսել, ապա ո՛չ, դա այդպես չէ»,-ասել է Ռուսաստանի նախագահը։
Ռուսաստանի առաջնորդը նշել է, որ կողմերը վիճել են մի շարք հարցերի շուրջ, սակայն մտադիր են շարունակել լուծումներ փնտրել։
https://www.youtube.com/watch?v=Xip6QQrx41I&feature=youtu.be
Օրինակ՝ տարաձայնություններ են ծագել Թուրքիայում ռուսական գազի գնի շուրջ։ Անկարան պնդում է հստակ գին սահմանել, սակայն «Գազպրոմ»-ը վառելիքի արժեքը ձևավորում է ըստ շուկայական իրավիճակի, ոչ իր կամքով։
Պուտինը նաև հիշեցրել է, որ Ռուսաստանը Թուրքիայի համար գազի վստահելի մատակարար է, և դա արդեն ապացուցված է։
«Թուրքիան շատ պայմանագրեր ունի գազի մատակարարման ոլորտում, և ոչ բոլորն են կատարում պայմանագրով ստանձնած իրենց պարտավորվածությունները։ Իսկ Ռուսաստանը կայուն կատարում է՝ և՛ ըստ ծավալների, և՛ ըստ արժեքի»,-ասել է Ռուսաստանի նախագահը։