«Կազանում որևէ առաջընթաց չեղավ, որովհետև չպետք է լիներ»,- այսօր լրագրողների հետ հանդիպման ժամանակ ասաց Կովկաս ինստիտուտի տնօրեն Ալեքսանդր Իսկանդարյանը: Իսկ այն բոլոր սպասելիքները, որ կային մինչ Կազանի հանդիպումը, ըստ քաղաքագետի պայմանավորված են ներքաղաքական իրավիճակով և ընդհանուր տագնապի մթնոլորտով, որ առկա է հասարակության մեջ, և այս ամենն էլ շրջանառվում է քաղաքական գործիչների կողմից:
Իսկանդարյանը նշեց, որ այժմ ԼՂ հարցում որևէ առաջընթացի սպասելն անտեղի է: Անդրադառնալով Մինսկի խմբի ֆորմատի փոփոխության վերաբերյալ խոսակցություններին՝ Իսկանդարյանը նշեց, որ դա ընդհանրապես հնարավոր չէ, քանզի Մինսկի խումբը կայացած մարմին է և իրականացնում է իր վրա դրված խնդիրը, անգամ եթե հրապարակայնորեն դա չի երևում. «Մինսկի խմբի ֆորմատն այս պահին փոխելը հիմարություն կլինի, քանզի մյուս ֆորմատները չափազանց էկզոտիկ կլինեն»:
Իսկանդարյանը նկատեց, որ այստեղ հարց է Եվրամիության ակտիվացումը: Նրա գնահատմամբ, ԵՄ-ն փորձում է մտնել մի դաշտ, որտեղ ինքը կկարողանա որոշակիորեն ակտիվ լինել. «Պատճառը հասկանալի է՝ ԵՄ-ն մասնակցություն ունի մերձդնեստրյան կոնֆլիկտի կարգավորման գործում, իսկ ահա Հարավային Օսիայի և Աբխազիայի խնդրի կարգավորումից ընդհանրապես դուրս է մնացել և այժմ ցանկանում է ԼՂ խնդրի կարգավորմանը մասնակցություն ունենալ: Սակայն անգամ ԵՄ-ում մտադրություն չկա փոխելու Մինսկի խումբը այլ ֆորմատով»:
