ԱԶԿ փոխնախագահ Ալի Իհսան Յավուզը հայտարարել է, որ Ստամբուլի ընտրական հանձնաժողովը հրաժարվել է բավարարել Թուրքիայի նախագահ Ռեջեփ Թայիփ Էրդողանի ղեկավարած Արդարության և զարգացում կուսակցության (ԱԶԿ) պահանջները`Ստամբուլի Բյուչեքմեջ շրջանի քաղաքապետի ընտրությունների արդյունքները անվավեր ճանաչելու վերաբերյալ՝ գրում է mk-turkey.ru/politics-ը:
«Շրջանի ընտրական հանձնաժողովը մերժեց, և մարզային ընտրական հանձնաժողովը նույնպես: Մեկ այլ տարբերակ կա՝ բարձրագույն ընտրական հանձնաժողով գնալ: Մեր գործընկերները կքննարկեն այդ հարցը և որոշում կկայացնեն», – ասել է Յավուզը: Նա նաև նշել է, որ «քվեարկության արդյունքների չեղյալ հայտարարման մասին դիմումը վերաբերում է միայն Ստամբուլի Բյուչեքմեջ շրջանին, ոչ թե ողջ Ստամբուլին»՝ հաղորդում է TASS- ը:
Կուսակցությունը ընտրությունների արդյունքների անվավեր ճանաչման հիմք է համարում ընտրողների գրանցման հետ կապված իրավիճակը: Այնտեղ կատարվել են լուրջ խախտումներ, որոնք, ԱԶԿ-ի կարծիքով, ուղղակիորեն ազդել են քվեարկության արդյունքների վրա: Յավուզը հայտարարել է, որ «մենք խոսում ենք ավելի քան 20 հազար ընտրողների մասին, իրավիճակը լայնամասշտաբ է և կարծես ծրագրված խախտում է»: