ԵԱՏՄ-ում միասնական արժույթի անցնելն ինտեգրման վերջնական աստիճանն է, երբ օրենսդրական, այսպես ասած, 4 տեսակի ազատությունների ներդաշնակեցումներից հետո փորձ է արվում տնտեսական հարթակի համար ավելի կանխատեսելի տեսլականներ տալու համար քննարկել այդ հարաբերությունները։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արտակ Մանուկյանը։
Նա համաձայնեց ԿԲ ներկայացուցչի տեսակետին, որ դա 2025 թվականից ավելի վաղ ակնկալելը տրամաբանված չէ. «Սա ունի թե դրական, թե բացասական ռիսկեր։ Եթե դիտարկում ենք այն կառուցվածքը, որ կա ներկայումս, այսինքն Ռուսաստանը որպես արտահանման շուկա, ինչպես նաև ՌԴ-ում տեղի ունեցող փոփոխությունների ազդեցությունը Հայաստանի տնտեսության վրա, սա կարծես թե փաստարկ է, բայց այստեղ այլ խնդիր էլ կա, որ այդ առումով Կենտրոնական բանկերի ինքնավարություն է որոշակիորեն զոհաբերվում, և փոքր երկրներն, ըստ էության, պետք է հետևեն մեծ երկրներում իրականացվող մակրոտնտեսական զարգացումներին և դրանք տարբեր չափի կառավարելիություն ունեն»,-ընդգծեց Արտակ Մանուկյանը։
