Ֆրանսիայի արտաքին գործերի նախարար Ալեն Ժյուպեն Մոսկվա կատարած այցի ժամանակ ասել է, որ ղարաբաղյան հակամարտության կողմերին լրացուցիչ առաջարկներ կներկայացվեն:
«Եթե նոր առաջարկները կրկին Մինսկի խմբի հին փիլիսոփայության շրջանակներում են արվելու, ապա որևէ դրական բան Հայաստանի համար կանխատեսելը կամ սպասելը ավելորդ է: Եթե նոր առաջարկները դուրս են լինելու հին փիլիսոփայությունից, ապա մենք կարող ենք գոնե կանխատեսել, որ հնարավոր է նաև հայանպաստ առաջարկներ լինեն»,- «Առաջին լրատվականի» հետ զրույցում կարծիք հայտնեց Ռազմավարական և ազգային հետազոտությունների հայկական կենտրոնի փորձագետ Էդգար Վարդանյանը:
Փորձագետի կարծիքով, եթե այդ նոր առաջարկներով չի ճանաչվելու Ղարաբաղի ժողովրդի ինքնորոշման ոտնահարված իրավունքը, ապա մենք նոր բան չենք կարող սպասել. «Միջազգային հանրությունը ԼՂ-ն ճանաչում է որպես Ադրբեջանի մի մաս, սակայն դե ֆակտո ասում են, որ կա ինքնահռչակ մի հայկական հանրապետություն: Ըստ էության, երկու կողմերն էլ խնդրի հետ կապված ծայրահեղ դիրքորոշումներ ունեն: Պետք է միջնորդները առաջարկեն մի այնպիսի հայեցակարգ, որը հնարավորություն կտա իրական բանակցություններ վարել»:
Նա նաև նկատեց, որ դժվար է կանխատեսումներ անել, երբ գործընթացը գաղտնի է և բավարար տեղեկատվություն չկա: Վարդանյանի խոսքերով, ըստ էության պարզ չէ, թե ինչ փաստաթուղթ է դրված եղել բանակցային սեղանին և միայն հայտնի է, ՀՀ արտգործնախարարի փոխանցմամբ, որ Ադրբեջանի կողմից եղել են մոտ 10 նոր առաջարկներ: ՌԱՀՀԿ փորձագետը նշեց, որ կարևոր է այն հանգամանքը, որ պաշտոնական Բաքուն չի հերքել այս տեղեկատվությունը, բայց նաև հայտարարել է, որ Հայաստանն էլ չափից ավելի զիջումներ է պահանջել, ինչն էլ չի հերքվել պաշտոնական Երևանի կողմից:
Հիշեցնենք, որ մինչ կազանյան հանդիպումը նոր հայեցակարգի մշակման մասին խոսել է նաև ՄԽ ֆրանսիացի նախագահ Բեռնար Ֆասիեն, այժմ էլ նման հայտարարություն անում է Ֆրանսիայի արտգործնախարարը:
Էդգար Վարդանյանը նշեց, որ այստեղ անմիջական կապ կա, և դա պայմանավորված է նրանով, որ Եվրամիությունը հայտ է ներկայացրել ՄԽ-ում առավել ակտիվ գործունեություն ծավալելու համար: Վարդանյանի գնահատմամբ՝ վերջին շրջանում անընդհատ խոսվում է այն մասին, որ Ֆրանսիան բավականին պասիվ դիրքորոշում ունի Մինսկի խմբում և լիարժեքորեն չի կարողանում ներկայացնել միացյալ Եվրոպայի տեսակետը և խոսք է գնացել այն մասին, որ հնարավոր է Ֆրանսիան փոխարինվի Եվրամիություն կառույցով. «Այդ մեսիջը հստակ տրված էր, և ես կանխատեսում էի, որ առաջիկայում Ֆրանսիան պետք է առավել ակտիվ դիրքորոշում ունենա, և Եվրամիությունը իր ակտիվ մասնակցության գաղափարը պետք է առաջ տանի»:
