Ամենամեծ շոկոլադե սալիկից, ամենաերկար ճոպանուղուց զատ՝ պարզվում է Հայաստանը նաև առցանց դրամաշնորհային համակարգով է առաջինը։ ՀՀ սպորտի և երիտասարդության նախարարության կողմից ներմուծված այս համակարգը շատերին զարմացրեց, ինչու չէ՝ նաև զայրացրեց։ Բաց ու թափանցիկ մրցույթ անցկացնելը մեծացրեց թերհավատների ու կասկածամիտների թիվը։ Մարդիկ համակարգում գրանցելով իրենց հասարակական կազմակերպությունները, պարզվում է, կասկածել են ու նույնիսկ փորձել համակարգը։ ՀԿ-ներից մեկի ներկայացուցիչը պատմեց, որ պահանջվող մի փաստաթղթի փոխարեն այլ տեղեկանք էր մուտքագրել։ «Հաջորդ օրը ստացա էլեկտրոնային նամակ, որով տեղեկացվում էի, որ ճշտում պետք է անել։ Հավատացի, մտածեցի, որ ինչ-որ մի բան հնարավոր է փոխվի մեր երկրում»,- ասում է մեր զրուցակիցը։ Համակարգին ծանոթները հետո էլ դժգոհեցին ծրագիրը համակարգ մուտքագրելուց; Սա էլ իր դժվարությունը ուներ՝ այսքան նիշ. պահանջվածից ոչ մի տառ ավել չես կարող մուտքագրել։ Ու այդ ժամանակ համակարգի պատասխանատու Արեգ Թադևոսյանին էին հունից հանում։ «Պատկերացրեք միայն ես օրը 8-10 անգամ զանգում էի այդ մարդուն՝ չճանաչելով նույնիսկ ով է»,-ասում է ՀԿ-ի ներկայացուցիչը։ «Կապանի ուսուցիչներ» ՀԿ-ի նախագահ Մագդա Գևորգյանի խոսքով, իր ղեկավարած ՀԿ-ի բախտը երբեք չէր բերում։ Մասնակցում էր դրամաշնորհային տարբեր ծրագրերի, բայց ապարդյուն։ «Այս մեկին էլ դիմեցի ու չէի պատկերացնում, որ կշահեմ։ Երբ cragrer.am-ում կարդացի, որ մեր ներկայացրած «Սովորենք՝ սովորեցնենք» ծրագիրը 154,7 միավորով հաղթող է ճանաչվել, համոզվեցի, որ բաց ու թափանցիկ է այս մրցույթը»,- ասում է տիկին Գևորգյանը՝ պատրաստվելով 2-րդ ծրագիրը ներկայացնել։ Սակայն Մ. Գևորգյանի մի հարցում մտահոգ է. եղանակները ցրտում են, կդժվարանան գյուղական ուսուցիչներին քաղաք բերելը և ուսուցանելը։ Իսկ ֆինանսավորումը դեռ չկա, ու ծրագրի մեկնարկն ուշանում է։ Ըստ ՀԿ-ներից մեկի նախագահի՝ նախկին համակարգը մի բանով լավ էր։ «Եթե չէիր հաղթում, մտածում էիր, որ քեզնից լավ ծրագիր ներկայացնող կա, բայց հիմա կարդում ես, ու վատ կզգայի, եթե ոչ լիարժեք որևէ հայտ մրցունակ լիներ»,-ասում է ՀԿ-ականը։ Վերջինիս ՀՀ սպորտի և երիտասարդության հարցերի փոխնախարար Արսեն Քարամյանը հավաստիացրել է, որ անկախ փորձագետների խումբը դժվար թե վատ ծրագրին բարձր միավորներ տա։ Ըստ որոշ տեղեկությունների՝ Եվրախորհրդարանի փորձագետներին հետաքրքրել է առցանց դրամաշնորհային համակարգը, ու նրանք ՀՀ կառավարությանը առաջարկել են պիլոտային ծրագիր մշակել եվրոպական երկրներում նույն փորձը ներդնելու։ Այս պարագայում, պարզվում է, եվրոպացիները հայերից սովորելու բան ունեն։
