Արցախի անվտանգության խորհրդի քարտուղար Վիտալի Բալասանյանը «Առաջին լրատվական»-ի հետ զրույցում վերահաստատեց 2020 թվականի Արցախի նախագահական ընտրություններում առաջադրվելու իր մտադրությունը։ Մեր այն դիտարկմանը, թե ինքը ՀՀ նախկին իշխանությունների նախընտրած թեկնածուն է լինելու, Բալասանյանը պատասխանեց.«Ես որևէ մեկի թեկնածուն առ այսօր չեմ եղել։ Ես առաջին Գերագույն խորհրդի պատգամավոր եմ եղել, բայց որևէ մեկինը չեմ եղել,եղել եմ նախագահի թեկնածու, բայց որևէ մեկինը չեմ եղել։ Ես անձի չեմ պաշտպանում, իմ լուման եմ դրել, որ մենք չգնանք տարանջատման, ես անձի համար չեմ եկել Հայաստան ու անձի համար չեմ ծառայել»։
Բալասանյանը ընդգծեց.«Ես բոլոր նախագահներին հարգել եմ և հարգում եմ։ Ես որևէ մեկի մարդը չեմ եղել, այսօր էլ որևէ մեկի թեկնածուն չեմ լինելու, կլինեմ ընտրողների թեկնածուն ու կծառայեմ ժողովրդին։ Խոստանում եմ բոլորին ծառայել, կլինեմ մաքուր ու ազնիվ»։
Վիտալի Բալասանյանի հետ զրուցել ենք նաև ապրիլյան քառօրյա պատերազմի, բանակցային գործընթացի շուրջ։ Հարցազրույցի այդ հատվածը կարող եք դիտել «Առաջին լրատվական»-ի կայքէջում ապրիլի 2-ին։
