Ամերիկացի, պուերտոռիկացի երգիչ, երաժիշտ Դանիել Դեքերը, ով 2000-ականներից ի վեր Հայաստանում տարբեր նախագծերի մեջ է ներգրավված եղել, «Առաջին լրատվական»- ի հետ զրույցում անդրադառնալով հարցին, թե ինչպես սկսվեց այդ ամենը, նշեց. «Այս ամենը սկսվեց, երբ ես լսեցի Արա Գևորգյանի երաժշտությունը, նրա մեղեդիներն ինձ ուղղակիորեն գերել էին, ես կապ հաստատեցի նրա հետ, և այդպես հիմք դրվեց մեր ընկերությանը և համագործակցությանը, ինչի արդյունքում ես ինձ համար բացահայտեցի նաև Հայաստանը»:
Դեքերը վստահեցրեց, որ տարիներ շարունակ համագործակցել է ոչ միայն ԱՄՆ-ում, այլ նաև աշխարհի տարբեր ծայրերում բնակվող հայերի հետ: «Ինչ-որ տեղ իմ առաքելությունն եմ համարում հայերին օգնելը, համատեղ տարբեր խնդիրների մասին բարձրաձայնելը, ինչպես, օրինակ, Ցեղասպանության մասին,- նշեց երգիչը:-Վերջերս Արա Գևորգյանի հետ ավարտել ենք մի գեղեցիկ երգի ձայնագրություն, որը պատմում է Արաքս գետի մասին: Գերվել էի այդ գեղեցկագույն ստեղծագործության մեղեդայնությամբ: Այս երգը սիրո խոստովանություն է Արաքս գետից՝ հայերին»:
Դեքերը նաև նշեց, որ Հայաստանում հաճախ է լինում, արդեն 19-րդ անգամ է այստեղ, և 2015-ին ստացել է ՀՀ քաղաքացիություն. «Դա Հայաստանի նկատմամբ իմ պարտավորությունը նոր մակարդակի բարձրացնելու հնարավորություն էր, և ես Ցեղասպանության հարյուրամյակի առիթով զոհերի հիշատակը յուրովի հարգելու հնարավորություն ունեցա. սա տարբերակ էր ասելու, որ ես թեև ծնունդով հայ չեմ, բայց հայ եմ իմ ընտրությամբ և սրտով»:
Անդրադառնալով մեկ տարի առաջ Հայաստանում տեղի ունեցած փոփոխություններին, երգիչը նշեց, որ իրադարձություններին հետևում էր համացանցի, ընկերների միջոցով. «Ինձ ցնցել էր հայերի միասնությունը, վարչապետի վճռականությունը… Ուրախ էինք տեսնել, որ իրադարձությունների ընթացքը թավշյա էր, և հեղափոխության օրերին տեսնում էինք առաջնորդի, որը պայքարում էր ոչ թե զուտ իշխանության, այլ նաև հեղափոխության ժամանակ հայտարարված արժեքների համար և անտարբեր չէր Հայաստանի ապագայի նկատմամբ: Դա մեծ ակնածանք է առաջացնում»:
Մանրամասն՝ տեսանյութում:
