Մարտի 22-ին ՀՀ ոստիկանության պետ Վալերիյ Օսիպյանն ընդունեց ՀՀ-ում ում Արաբական Միացյալ Էմիրությունների արտակարգ և լիազոր դեսպան Մուհամմադ Ալ Զաաբին:
Ողջունելով հյուրին՝ Վալերի Օսիպյանը կարևորեց երկու պետությունների բարձր մակարդակի հարաբերությունները, ինչի շնորհիվ կարևոր համագործակցություն կա տարբեր ոլորտներում, այդ թվում՝ նաև իրավապահ կառույցների միջև:
Ոստիկանության պետը նշեց, որ երկու երկրների իրավապահները հիմնականում համագործակցում են թրաֆիքինգի, թմրամիջոցների անօրինական շրջանառության, ահաբեկչության դեմ պայքարի շրջանակներում:
Չափացանց կարևոր ու արդյունավետ համագործակցություն է ձևավորվել նաև Ինտերպոլի ազգային կենտրոնական բյուրոների միջև, ինչի շնորհիվ հայտնաբերվում են հետախուզվողներ, իսկ անցած տարի նաև Արաբական Միացյալ Էմիրություններից հետախուզվողը արտահանձնվեց Հայաստանին:
Մուհամմադ Ալ Զաաբին շնորհակալություն հայտնեց ջերմ ընդունելության համար և համագործակցությունը սերտացնելու պատրաստակամություն հայտնեց:
Մատնանշվեցին իրավապահ կառույցների միջև համագործակցության նոր ոլորտներ, խոսվեց Հայաստանի ոստիկանությունում իրականացվող բարեփոխումների մասին։
Հանդիպմանը կողմերը քննարկեցին նաև փոխադարձ հետաքրքրություն ներկայացնող այլ հարցեր:
