Մերձավոր Արևելքի ինստիտուտի նախագահ Եվգենի Սատանովսկու կարծիքով՝ Իսրայելում Հայաստանի դիվանագիտական առաքելություն բացելու հանգամանքը կարող է դրական ազդեցություն ունենալ այդ երկրի՝ Հայոց ցեղասպանությունը ճանաչելու գործընթացի վրա:
Նրա խոսքով՝ Իսրայելի՝ Հայոց ցեղասպանությունը ճանաչելուն նպաստում են Յոել Էդելշտեյնը, Ավիգդոր Լիբերմանը և այլոք, ովքեր կապեր են ունեցել նախկին Խորհրդային միության հետ։
«Իսկ այդ թեմայի լոբբինգով հիմնականում Թուրքիան է զբաղվում։ Էրդողանի կոշտ հայտարարությունները, ինչպես նաև Անկարայի՝ ՀԱՄԱՍ-ին սատարող ցանկացած գործողություն ավելի ու ավելի է հաստատում միտքը, որ Թուրքիան և Իսրայելը դաշնակիցներ ու գործընկերներ չեն, իսկ Հայոց ցեղասպանության ճանաչումն անհրաժեշտություն է»,-ասել է Սատանովսկին։
Նրա կարծիքով՝ Իրանը կարող է բացասաբար ընկալել Իսրայելում Հայաստանի դեսպանատուն բացվելու փաստը։