«Անհրաժեշտ է, որ իշխող ուժը մշակի և հանրությանը ներկայանա իր քաղաքական դոկտրինով՝ հանրային կյանքի կազմակերպման գաղափարական սկզբունքների վրա խարսխված քաղաքական ծրագրով՝ հայեցակարգով»,- օրերս ֆեյսբուքյան իր գրառումներում այս մասին նշել էր նախկին վարչապետ, Քրիստոնեա-դեմոկրատական կուսակցության նախագահ Խոսրով Հարությունյանը: «Առաջին լրատվական»-ի հետ զրույցում մեկնաբանելով իր այս գրառումը՝ Խ. Հարությունյանը նշեց. «Մեր իրականության մեջ ամենամեծ խնդիրը եղել է այն, որ կուսակցությունները հանրությանը չեն ներկայացրել հանրային կյանքի կազմակերպման վերաբերյալ իրենց դոկտրինը: Դա չպետք է նույնականացնել նախընտրական ծրագրի հետ: Պետք է ներկայացնեն սկզբունքների ու նպատակների մի ամբողջ հիերարխիա, որը հնարավորություն կտա գնահատել, թե տվյալ կուսակցությունը քաղաքական, գաղափարաբանական ինչ սկզբունքներ է դավանում: Եթե դուք չեք դավանում սոցիալական շուկայի, սոցիալական պետության դոկտրինը, ապա պետության դերակատարությունը հանրային կյանքում, տնտեսական գործընթացներում, միևնույն է, որակապես տարբերվում է… Օրինակ՝ սոցիալական պետությունը գաղափարախոսություն է, դրանից է բխում առողջ մրցակցությունը, շուկայական գնագոյացումը, այլ ոչ թե մոնոպոլիաների կողմից է գին թելադրվում»:
Անդրադառնալով դիտարկմանը, որ Ն. Փաշինյանը բազմիցս հայտարարել է, որ «իզմ»-երի չեն հարելու, Խ. Հարությունյանը նշեց, որ անկախ ամեն ինչից, միևնույն է, կուսակցության քաղաքական դոկտրինից խուսափել չեն կարող:
«Նիկոլ Փաշինյանի առաջ քաշած թեզերից մեկը պաշտպանում եմ. դա այն է, որ հանրությունը չպետք է վերածվի խնամառուների հանրության, այսինքն՝ քաղաքացին չպետք է ոտքը ոտքին գցի և սպասի, որ պետությունն իրեն պահի. այս թեզը պաշտպանում եմ, սա համապատասխանում է լիբերալ տնտեսական մոդելին»,- նշեց նախկին վարչապետը:
«Համոզված ենք, որ շուկայական տնտեսությունն ամենասոցիալականն է, որովհետև ոչ թե խարսխված է տնտեսական պարտադրանքների վրա, այլ այդ շուկայի հիմքում ընկած է անհատի պահանջարկը բավարարելու ձգտումը,- նշեց Խ. Հարությունյանը:- Եվ այն պետք է խարսխված լինի ազատ մրցակցության վրա»:
Մանրամասն՝ տեսանյութում:
