Twitter միկրոբլոգների ծառայության շուրջ 80 հազար օգտատերեր հետ են կանչել իրենց բաժանորդագրությունը Թուրքիայի նախագահ Աբդուլլահ Գյուլի էջից այն բանից հետո, երբ նա ստորագրել է տեղեկատվության պաշտպանության մասին օրենքը:
«Նախագահ Գյուլը հավանություն տվեց համացանցի մասին օրենքին: Բարի գալուստ, համացանցային գրաքննության դարաշրջան»,- գրել է Twitte-ի օգտատերերից մեկը: Ինչպես նշում է Interfax-ը, Գյուլը դեռևս մոտ 4.3 մլն բաժանորդ ունի:
Ինչպես անձամբ հայտնել է Գյուլն իր միկրոբլոգում, ինքը վավերացրել է օրենքն այն բանից հետո, երբ թուրքական կառավարությունը վստահեցրել է իրեն, որ կմեղմացնի նոր օրենքի որոշ վիճելի կետեր:
Օրենքի՝ ուժի մեջ մտնելուց հետո թուրքական իշխանությունները կարող են արգելափակել կայքերն առանց դատարանի նախնական որոշման: Բացի այդ, համացանցային փրովայդերները կպարտավորվեն պահել օգտատերերի մասին տեղեկությունները երկու տարի, ինչպես նաև տրամադրել դրանք իշխանությունների պահանջով:
Ընդդիմությունն ու իրավապաշտպան խմբերը դեմ են այդ նախաձեռնությանը: Սակայն կառավարությունը հերքում է բոլոր մեղադրանքները և հաստատում, որ օրենքը կբարելավի տեղեկատվության պաշտպանությունը:
Կառավարությունում ծրագրվում է մտցնել դրույթ, որը կպարտավորեցնի ստանալ դատական արտոնություն մինչ որևէ կայքի արգելափակումը: